فیلڈ مارشل سے ایرانی وزیر خارجہ کا رابطہ، خطے کی صورتحال پر مشاورت

اسلام آباد: ایرانی وزیر خارجہ عباس عراقچی نے فیلڈ مارشل سید عاصم منیر سے ٹیلیفون پر رابطہ کیا، جس میں خطے کی موجودہ صورتحال اور باہمی دلچسپی کے امور پر تبادلہ خیال کیا گیا۔

میڈیا رپورٹس کے مطابق گفتگو کے دوران اہم علاقائی معاملات اور تازہ ترین پیش رفت پر بات چیت ہوئی، جبکہ دونوں رہنماؤں نے خطے میں جاری صورتحال پر ایک دوسرے سے خیالات کا اظہار کیا۔

ایرانی سرکاری خبر ایجنسی کے مطابق عباس عراقچی نے یہ رابطہ چین کے سرکاری دورے کے دوران کیا۔

دونوں رہنماؤں کے درمیان پاک ایران سرحدی صورتحال اور خطے میں پائیدار امن کے قیام کے لیے مشترکہ کوششوں پر بھی تبادلہ خیال ہوا، جبکہ باہمی تعاون اور علاقائی سلامتی کے حوالے سے ہم آہنگی بڑھانے پر زور دیا گیا۔