نجی تصاویر لیک کرنے کی دھمکیاں، شادی سے قبل کون سا اہم فیصلہ کر لیا تھا؟، مومنہ اقبال نے راز افشاں کردیا

لاہور: معروف پاکستانی اداکارہ مومنہ اقبال نے رکن پنجاب اسمبلی ثاقب چدھڑ پر ہراسانی اور بلیک میلنگ کے الزامات عائد کرتے ہوئے کہا ہے کہ مبینہ دھمکیوں اور ذہنی دباؤ کے باعث انہیں شدید مشکلات کا سامنا کرنا پڑا۔

اپنے حالیہ بیان میں مومنہ اقبال نے دعویٰ کیا کہ ثاقب چدھڑ کی جانب سے انہیں ہراساں کیا گیا اور مبینہ طور پر ان کی نجی تصاویر اور ذاتی مواد سوشل میڈیا پر جاری کرنے کی دھمکیاں دی گئیں۔ اداکارہ کے مطابق ان حالات کے باعث انہیں اپنی نجی زندگی اور عزت کے حوالے سے شدید پریشانی کا سامنا رہا۔

اداکارہ نے بتایا کہ ثاقب چدھڑ ان کے گھر رشتہ لے کر آئے تھے، تاہم ان کے والد نے حتمی فیصلہ کرنے سے قبل کچھ وقت مانگا تھا۔ بعد ازاں انہیں ثاقب چدھڑ کی پہلی اہلیہ کی جانب سے پیغامات موصول ہوئے، جن سے انہیں ان کی سابقہ شادی کے بارے میں علم ہوا۔

مومنہ اقبال کے مطابق تنازع کے دوران ان کے منگیتر حمزہ نے ان کا ساتھ دیا اور مشکل صورتحال میں ان سے تعاون جاری رکھا۔

واضح رہے کہ مومنہ اقبال کی جانب سے عائد کیے گئے الزامات کی آزادانہ طور پر تصدیق سامنے نہیں آئی۔ معاملے سے متعلق مختلف حلقوں کی جانب سے تحقیقات کا مطالبہ بھی کیا جا رہا ہے۔