حماد اظہر کی گرفتاری سیاسی انتقام اور فسطائیت کی بدترین مثال ہے، پاکستان تحریک انصاف

 پاکستان تحریک انصاف نے اپنے سینئر رہنما اور سابق وفاقی وزیر حماد اظہر کی گرفتاری پر شدید ردعمل کا اظہار کرتے ہوئے اسے سیاسی انتقام قرار دیا ہے۔

پارٹی کی جانب سے جاری بیان میں کہا گیا ہے کہ حماد اظہر کو مسلسل سیاسی کارروائیوں کا نشانہ بنایا جا رہا ہے جبکہ حکومت سیاسی مخالفین کو دبانے کے لیے ریاستی طاقت استعمال کر رہی ہے۔

پی ٹی آئی کے مطابق اگر حماد اظہر کے خلاف مقدمات موجود ہیں تو انہیں قانون کے مطابق عدالت میں پیش کیا جائے اور ان کے قانونی و بنیادی حقوق کا خیال رکھا جائے۔

پارٹی نے کہا کہ سیاسی رہنماؤں اور کارکنوں کی گرفتاریوں سے تحریک انصاف کی آواز کو خاموش نہیں کیا جاسکتا۔ پی ٹی آئی نے مطالبہ کیا کہ حماد اظہر کو فوری طور پر عدالت میں پیش کیا جائے اور سیاسی بنیادوں پر کارروائیوں کا سلسلہ ختم کیا جائے۔