اے این ایف کی کارروائی، افغان منشیات اسمگلنگ نیٹ ورک بے نقاب

کراچی: اینٹی نارکوٹکس فورس (اے این ایف) کی فراہم کردہ اطلاعات پر سری لنکن اور امریکی حکام نے کارروائی کرتے ہوئے افغانستان سے منسلک بین الاقوامی منشیات اسمگلنگ نیٹ ورک کو بے نقاب کردیا۔

اے این ایف کے مطابق کراچی پورٹ پر کارروائی کے دوران ایک کنٹینر سے 200 کلوگرام آئس برآمد کی گئی، جبکہ افغان نیٹ ورک کے مبینہ سرغنہ احسان اللہ اور ایک مقامی سہولت کار کو گرفتار کرلیا گیا۔

ترجمان کے مطابق افغان سرغنہ سے تفتیش کے دوران کولمبو منتقل کی جانے والی منشیات سے متعلق اہم معلومات حاصل ہوئیں، جنہیں اے این ایف نے بروقت سری لنکن حکام اور امریکی ادارے ڈرگ انفورسمنٹ ایڈمنسٹریشن (ڈی ای اے) کے ساتھ شیئر کیا۔

اے این ایف کی فراہم کردہ معلومات کی بنیاد پر مشترکہ کارروائی کے دوران کولمبو پورٹ پر تولیوں میں چھپائی گئی 471 کلوگرام آئس بھی برآمد کرلی گئی۔

ترجمان کے مطابق کراچی اور کولمبو پورٹس سے افغان نیٹ ورک سے منسلک مجموعی طور پر 671 کلوگرام آئس ضبط کی گئی۔

اے این ایف ترجمان کا کہنا ہے کہ پاکستان افغانستان سے بننے والی منشیات سے متاثرہ ملک ہے، جبکہ سری لنکن حکام اور امریکی ڈی ای اے نے منشیات اسمگلنگ کے خلاف کارروائیوں میں اے این ایف کی پیشہ ورانہ صلاحیت اور مؤثر تعاون کو سراہا ہے۔

ترجمان کے مطابق یہ کارروائی بین الاقوامی منشیات اسمگلنگ کے خلاف اے این ایف کی انٹیلی جنس صلاحیت اور عالمی اداروں کے ساتھ مؤثر تعاون کی عکاس ہے۔