مکہ معاہدہ اجتماعی سلامتی، تزویراتی تعاون وعلاقائی استحکام کیلئے اہم پیشرفت ہے، اسحاق ڈار

لندن: نائب وزیراعظم و وزیر خارجہ اسحاق ڈار نے کہا ہے کہ پاکستان، سعودی عرب اور ترکیہ کے درمیان مکہ دفاعی معاہدہ اجتماعی سلامتی، تزویراتی تعاون اور علاقائی استحکام کے لیے اہم پیش رفت ہے۔

لندن میں پاکستانی برادری سے خطاب کرتے ہوئے اسحاق ڈار نے کہا کہ پاکستان نے حالیہ عرصے میں کامیاب سفارت کاری، بڑی عالمی طاقتوں کے ساتھ بہتر روابط اور علاقائی امن کے لیے مؤثر کردار کے ذریعے عالمی سطح پر اپنی ساکھ مزید مضبوط کی ہے۔

انہوں نے کہا کہ مشرق وسطیٰ میں کشیدگی کم کرنے، مذاکرات اور سفارتی کوششوں کے حوالے سے پاکستان کے کردار کو عالمی سطح پر سراہا گیا ہے، جس سے ایک ذمہ دار اور تعمیری ملک کے طور پر پاکستان کی شناخت مضبوط ہوئی۔

نائب وزیراعظم نے کہا کہ گزشتہ سال بھارت کے ساتھ جنگ میں پاکستان کی فتح سے عالمی سطح پر ملک کے وقار اور ساکھ میں مزید اضافہ ہوا۔ ان کے مطابق پاکستان نے اپنے عزم، دفاعی صلاحیت اور قومی یکجہتی کا بھرپور مظاہرہ کیا۔

اسحاق ڈار نے کہا کہ وزیراعظم شہباز شریف، فیلڈ مارشل عاصم منیر اور دفتر خارجہ کی متحرک سفارتی کوششوں سے پاکستان کی عالمی پوزیشن مزید مستحکم ہوئی ہے۔

معاشی صورتحال پر بات کرتے ہوئے انہوں نے کہا کہ پاکستان معاشی غیر یقینی سے نکل کر استحکام اور بحالی کی جانب بڑھ رہا ہے، جبکہ ترسیلات زر میں اضافہ اور بیرون ملک پاکستانیوں کے اعتماد میں بہتری بھی مثبت معاشی پیش رفت کی علامت ہے۔

انہوں نے برطانوی پاکستانی کمیونٹی کو پاکستان کا حقیقی سفیر قرار دیتے ہوئے کہا کہ بیرون ملک مقیم پاکستانی ملک کی ترقی اور مثبت تشخص کے فروغ میں اپنا کردار جاری رکھیں۔