نیپال قیامت خیز سیلاب، ہلاکتوں کی تعداد 675 تک پہنچ گئی، 2400 سے زائد لاپتا

کھٹمنڈو: نیپال میں آنے والے شدید اور اچانک سیلاب نے بڑے پیمانے پر تباہی مچا دی، جس کے نتیجے میں کم از کم 675 افراد جاں بحق جبکہ 2 ہزار 400 سے زائد لاپتا ہوگئے۔

نیپال اور تبت کی سرحدی علاقوں میں ریسکیو اور امدادی کارروائیاں جاری ہیں۔ نیپال ٹورازم بورڈ کے مطابق لاپتا افراد میں 320 غیر ملکی شہری بھی شامل ہیں۔

چینی سرکاری میڈیا کے مطابق تبت میں سیلاب اور مٹی کے تودے گرنے سے 16 افراد ہلاک اور 546 لاپتا ہیں، جبکہ لاپتا افراد میں 23 ممالک کے 261 غیر ملکی شہری شامل ہیں۔

چینی حکام نے لاپتا غیر ملکیوں کی تفصیلات متعلقہ ممالک کے سفارت خانوں اور قونصل خانوں کو فراہم کردی ہیں۔

ادھر نیپالی حکام نے بھوٹے کوشی دریا کے قریب سیلابی صورتحال میں اضافے پر شہریوں کو محتاط رہنے کی ہدایت کی ہے۔ حکام کے مطابق سیلاب کے بعد بننے والی جھیل کی سطح میں کمی آنا شروع ہوگئی ہے، جس سے مزید تباہی کا خدشہ کم ہوا ہے۔

امریکا نے سیلاب متاثرین کی امداد کے لیے 3.6 ملین ڈالر فراہم کرنے کا اعلان کیا ہے، جس کے تحت 10 ہزار متاثرہ خاندانوں کو تین ماہ تک ہنگامی خوراک فراہم کی جائے گی۔