پاکستانی آئل ریفائنریز اپ گریڈیشن کیلئے تیار، معاہدوں پر دستخط کے لیے تیار

اسلام آباد: وفاقی وزیر پٹرولیم علی پرویز ملک نے کہا ہے کہ پاکستان کی تمام پانچ آئل ریفائنریز ریفائنری اپ گریڈیشن پالیسی کے تحت معاہدوں پر دستخط کے لیے تیار ہیں۔

وزیر پٹرولیم نے کراچی میں ریفائنریز کی انتظامیہ سے ملاقات کے دوران اپ گریڈیشن پالیسی پر عملدرآمد، مالی و آپریشنل کارکردگی اور ملکی توانائی سکیورٹی کا جائزہ لیا۔

انہوں نے بتایا کہ پانچوں ریفائنریز کے معاہدوں پر آئندہ ماہ کے آغاز میں دستخط متوقع ہیں، جبکہ منصوبوں سے 6 ارب ڈالر سے زائد کی سرمایہ کاری آنے کی توقع ہے۔

علی پرویز ملک کے مطابق ریفائنری اپ گریڈیشن کے بعد پاکستان میں یورو 5 معیار کا پٹرول اور ڈیزل تیار کیا جاسکے گا، جس سے درآمدی ایندھن پر انحصار کم ہوگا۔

وفاقی وزیر نے کہا کہ مقامی سطح پر پٹرول اور ڈیزل کی پیداوار بڑھنے سے قیمتوں میں کمی میں بھی مدد مل سکتی ہے۔ حکومت ریفائنری اپ گریڈیشن پالیسی پر عملدرآمد میں درپیش مسائل کے حل کے لیے ریفائنریز کو سہولت فراہم کرے گی۔

ملاقات میں پارکو نے حب میں مجوزہ آئل سٹی کے منصوبے پر ہونے والی پیش رفت سے بھی وزیر پٹرولیم کو آگاہ کیا۔