سوشل میڈیا اور پروپیگنڈے کے دور میں حقائق پر مبنی تجزیہ ضروری ہے، فیلڈ مارشل عاصم منیر

راولپنڈی: آرمی چیف و چیف آف ڈیفنس فورسز فیلڈ مارشل سید عاصم منیر سے ہارورڈ بزنس اسکول کے طلبہ کے وفد نے ملاقات کی، جس میں علاقائی و عالمی صورتحال، پاکستان کے سکیورٹی تناظر اور امن و استحکام سے متعلق امور پر تبادلہ خیال کیا گیا۔

آئی ایس پی آر کے مطابق مختلف ممالک سے تعلق رکھنے والے طلبہ کے وفد نے پاکستان کے دورے کے دوران فیلڈ مارشل سید عاصم منیر سے ملاقات کی۔ اس موقع پر خطے اور دنیا میں امن، استحکام اور خوشحالی کے فروغ کی کوششوں پر بھی گفتگو ہوئی۔

فیلڈ مارشل سید عاصم منیر نے نوجوانوں میں تعلیم، ہنر مندی اور کاروباری صلاحیتوں کے فروغ کی اہمیت پر زور دیا۔ انہوں نے کہا کہ موجودہ غیر یقینی عالمی صورتحال میں نوجوانوں کا بامعنی کردار انتہائی اہم ہے۔

آرمی چیف نے کہا کہ سوشل میڈیا اور پروپیگنڈے سے متاثرہ موجودہ دنیا میں حقائق پر مبنی تجزیاتی صلاحیتیں وقت کی اہم ضرورت ہیں۔ نوجوانوں کو کسی بھی معلومات کو قبول کرنے سے قبل حقائق اور شواہد کی بنیاد پر تجزیہ کرنا چاہیے۔

ملاقات کے دوران پاکستان کے سکیورٹی ماحول اور عالمی و علاقائی معاملات پر بھی تفصیلی تبادلہ خیال کیا گیا۔

ہارورڈ بزنس اسکول کے طلبہ نے پاکستان کے دورے کو خوشگوار تجربہ قرار دیتے ہوئے پاکستانی عوام کی مہمان نوازی، کشادہ دلی اور گرمجوشی کو سراہا۔ وفد نے پاکستان میں موجود مختلف شعبوں میں وسیع امکانات اور مواقع کی بھی تعریف کی۔