سول ہسپتال اوستا محمد میں طبی سہولیات کی بہتری وقت کی ضرورت ہے، شان ثاقب ابڑو

گنداخہ:( نامہ نگار فریداحمد) پیپلز یوتھ آرگنائزیشن بلوچستان کے صوبائی جنرل سیکریٹری شان ثاقب ابڑو نے سول ہسپتال اوستا محمد کے نو تعینات میڈیکل سپرنٹنڈنٹ ڈاکٹر سید زین العابدین شاہ سے ان کے دفتر میں ملاقات کی، انہیں نئی ذمہ داریاں سنبھالنے پر مبارکباد پیش کی اور نیک خواہشات کا اظہار کرتے ہوئے کامیاب انتظامی و طبی خدمات کے لیے دعا کی،ملاقات کے دوران سول ہسپتال اوستا محمد کی مجموعی کارکردگی، عوام کو درپیش طبی مسائل، ادویات کی بلا تعطل فراہمی، ڈاکٹرز، اسپیشلسٹ فزیشنز، نرسنگ اور پیرامیڈیکل اسٹاف کی کمی، جدید طبی آلات، ایمرجنسی سروسز کی فعالیت، صفائی کے نظام، مریضوں کو بروقت اور معیاری علاج کی فراہمی سمیت دیگر اہم امور پر تفصیلی تبادلہ خیال کیا گیا،اس موقع پر میڈیکل سپرنٹنڈنٹ ڈاکٹر سید زین العابدین شاہ نے کہا کہ سول ہسپتال اوستا محمد میں عوام کو بہتر، معیاری اور بروقت طبی سہولیات فراہم کرنا ان کی اولین ترجیح ہے۔ انہوں نے یقین دلایا کہ ہسپتال میں ادویات کی دستیابی، طبی عملے کی کارکردگی میں بہتری، مریض دوست ماحول کی فراہمی اور انتظامی نظام کو مزید مؤثر بنانے کے لیے تمام دستیاب وسائل بروئے کار لائے جائیں گے تاکہ شہریوں کو علاج معالجے کی بہترین سہولیات میسر آ سکیں۔شان ثاقب ابڑو نے کہا کہ صحت کا شعبہ کسی بھی معاشرے کی ترقی کا بنیادی ستون ہے، اس لیے سول ہسپتال اوستا محمد کو جدید طبی آلات، ضروری ادویات، ماہر ڈاکٹرز اور مکمل طبی عملے سے آراستہ کرنا ناگزیر ہے۔ انہوں نے امید ظاہر کی کہ صوبائی وزیر لائیو اسٹاک سردارزادہ فیصل خان جمالی کی خصوصی توجہ، کاوشوں اور تعاون سے سول ہسپتال اوستا محمد میں ترقیاتی منصوبوں کا دائرہ مزید وسیع ہوگا، جدید طبی سہولیات فراہم کی جائیں گی، ادویات کی قلت کا خاتمہ ہوگا اور ڈاکٹرز و دیگر عملے کی کمی کو ترجیحی بنیادوں پر پورا کیا جائے گا، تاکہ اوستا محمد اور گردونواح کے ہزاروں شہریوں کو اپنے ہی ضلع میں معیاری، جدید اور بروقت علاج کی سہولت میسر آ سکے۔