عوام کو مہنگائی سے ریلیف دینا اولین ترجیح ہے، میر مرتضیٰ خان جمالی

گنداخہ: ( نامہ نگار فریداحمد) پاکستان پیپلز پارٹی نصیر آباد ڈویژن کے سینئر نائب صدر و چیئرمین مارکیٹ کمیٹی اوستا محمد میر مرتضیٰ خان جمالی نے کہا ہے کہ عوام کو مہنگائی سے ریلیف فراہم کرنا مارکیٹ کمیٹی کی اولین ترجیح ہے، جبکہ پرائس کنٹرول قوانین پر سختی سے عملدرآمد یقینی بنا کر اشیائے خورونوش کی سرکاری نرخوں پر دستیابی کو ممکن بنایا جائے گا۔انہوں نے ان خیالات کا اظہار جمالی ہاؤس کوئٹہ میں اوستا محمد سے تعلق رکھنے والے صحافیوں کے مختلف وفود سے ملاقات کے دوران گفتگو کرتے ہوئے کیا۔ میر مرتضیٰ خان جمالی نے کہا کہ ناجائز منافع خوری، ذخیرہ اندوزی اور مصنوعی مہنگائی کسی صورت برداشت نہیں کی جائے گی اور عوام کے مفاد کے تحفظ کے لیے تمام دستیاب وسائل بروئے کار لائے جائیں گے۔انہوں نے کہا کہ مارکیٹ کمیٹی انتظامیہ متعلقہ اداروں کے تعاون سے بازاروں کی مسلسل نگرانی کرے گی تاکہ روزمرہ استعمال کی اشیاء مقررہ نرخوں پر فروخت ہوں اور عام شہریوں کو حقیقی معنوں میں ریلیف مل سکے۔ ان کا کہنا تھا کہ حکومت عوام کو مہنگائی کے بوجھ سے نجات دلانے کے لیے سنجیدہ اقدامات کر رہی ہے اور مارکیٹ کمیٹی بھی اس سلسلے میں اپنی ذمہ داریاں پوری کرے گی۔چیئرمین مارکیٹ کمیٹی اوستا محمد نے مزید کہا کہ صحافی معاشرے کی آنکھ اور آواز ہیں، عوامی مسائل کو اجاگر کرنے میں میڈیا کا کردار انتہائی اہم ہے۔ انہوں نے یقین دلایا کہ عوامی مفاد، شفافیت اور بہتر مارکیٹ نظام کے قیام کے لیے میڈیا کی مثبت تجاویز کا خیرمقدم کیا جائے گا اور عوام کو ہر ممکن سہولت فراہم کرنے کے لیے مؤثر اقدامات جاری رکھے جائیں گے۔