دیامر کا تین روزہ تفصیلی دورہ، وزیراعلیٰ گلگت بلتستان کو خراجِ تحسین پیش کرتا ہوں، شعیب مغل

گلگت (رپورٹ؛ وحید منظر) پاکستان پیپلز پارٹی کے رہنما اور سیاسی ورکر شعیب مغل نے وزیراعلیٰ گلگت بلتستان کے دیامر کے تین روزہ تفصیلی دورے کو سراہتے ہوئے انہیں خراجِ تحسین پیش کیا ہے۔
اپنے ایک اخباری بیان میں شعیب مغل نے کہا کہ دیامر گلگت بلتستان کا ایک پسماندہ علاقہ ہے، جہاں عوام کو مختلف بنیادی مسائل اور ترقیاتی ضروریات کا سامنا ہے۔ ان کے بقول، ماضی میں کسی وزیراعلیٰ کی جانب سے دیامر کا اس قدر تفصیلی دورہ دیکھنے میں نہیں آیا، اس لیے موجودہ وزیراعلیٰ کا تین روزہ دورہ خصوصی اہمیت کا حامل ہے۔
انہوں نے کہا کہ ایسے دوروں سے علاقے کے عوام کے مسائل کو قریب سے سمجھنے، مقامی ضروریات کا جائزہ لینے اور ترقیاتی منصوبوں کی ترجیحات طے کرنے میں مدد مل سکتی ہے۔ دیامر جیسے پسماندہ علاقے کی ترقی کے لیے ضروری ہے کہ عوام کو بنیادی سہولیات کی فراہمی یقینی بنائی جائے اور تعلیم، صحت، سڑکوں اور دیگر شعبوں میں ترقیاتی کاموں پر خصوصی توجہ دی جائے۔
شعیب مغل نے امید ظاہر کی کہ وزیراعلیٰ گلگت بلتستان کے اس دورے کے نتیجے میں دیامر کے عوام کے دیرینہ مسائل کے حل کے لیے عملی اقدامات کیے جائیں گے اور علاقے کو ترقی کے قومی دھارے میں شامل کرنے کی کوششوں کو مزید تقویت ملے گی۔