پتوکی میں اوباشوں کی غنڈہ گردی نجی چینل کے رپورٹر پر بہیمانہ تشدد اور ڈکیتی

پتوکی(محمد زاہد نمائندہ)نجی ٹی وی چینل کے رپورٹر اور الیکٹرانک و پرنٹ میڈیا تحصیل پتوکی کے نائب صدر حافظ محمد اقبال پر تشدد اور 65 ہزار روپے نقدی چھیننے کا مقدمہ درج کر لیا گیا۔ واقعے کی سی سی ٹی وی فوٹیج میں ملزمان کو صحافی پر تشدد کرتے ہوئے واضح طور پر دیکھا جا سکتا ہے۔پتوکی میں میگا روڈ پر نجی ٹی وی چینل کے رپورٹر حافظ محمد اقبال کو تشدد کا نشانہ بنانے اور نقدی چھیننے کا واقعہ پیش آیا۔ ایف آئی آر کے مطابق شعیب علی اور سات نامعلوم افراد نے خبریں لگانے کی رنجش پر صحافی کو تشدد کا نشانہ بنایا اور جان سے مارنے کی دھمکیاں دیں، جبکہ ان کی جیب سے 65 ہزار روپے نقدی بھی چھین لی۔تھانہ سٹی پتوکی پولیس نے شعیب علی سمیت سات نامعلوم افراد کے خلاف مقدمہ درج کر لیا ہے۔ الیکٹرانک و پرنٹ میڈیا تحصیل پتوکی کے صدر چوہدری مقدر حسین اور دیگر عہدیداران نے ڈی پی او قصور آفتاب احمد پھلروان سے مطالبہ کیا ہے کہ ملزمان کو فوری گرفتار کرکے قانون کے کٹہرے میں لایا جائے اور صحافیوں کے تحفظ کو یقینی بنایا جائے۔