ایران سنجیدہ ہو تو امریکا بھی مذاکرات کے لیے تیار ہے، مارکو روبیو

امریکی وزیر خارجہ مارکو روبیو نے کہا ہے کہ واشنگٹن ایران کے ساتھ مشرقِ وسطیٰ میں جاری کشیدگی کے خاتمے کے لیے سفارت کاری اور مذاکرات کا راستہ اختیار کرنے کو تیار ہے، تاہم ایران کی جانب سے فی الحال سنجیدہ رویہ نظر نہیں آ رہا۔

رائٹرز کے مطابق مارکو روبیو نے فلپائن کے دارالحکومت منیلا میں جنوب مشرقی ایشیائی ممالک کے نمائندوں سے ملاقات کے دوران کہا کہ اگر ایران واقعی مذاکرات چاہتا ہے تو امریکا بھی بامعنی بات چیت کے لیے تیار ہے۔

انہوں نے کہا کہ امریکا سفارتی حل کو ترجیح دیتا ہے، لیکن اگر ایران کی جانب سے مثبت پیش رفت نہ ہوئی تو واشنگٹن اپنے قومی مفادات اور اتحادیوں کے تحفظ کے لیے دیگر اقدامات پر بھی غور کر سکتا ہے۔

روبیو کا کہنا تھا کہ خطے میں بڑھتی کشیدگی کے اثرات عالمی تجارت، توانائی کی ترسیل اور علاقائی استحکام پر پڑ سکتے ہیں، اسی لیے امریکا صورتحال کو سفارتی ذرائع سے حل کرنے کا خواہاں ہے۔

تجزیہ کاروں کے مطابق امریکی وزیر خارجہ کا بیان ایسے وقت میں سامنے آیا ہے جب امریکا اور ایران کے درمیان تعلقات کشیدہ ہیں اور دونوں ممالک کے درمیان مذاکرات کے امکانات غیر یقینی ہیں۔ اگر دونوں فریق دوبارہ مذاکرات کی طرف بڑھتے ہیں تو اس سے خطے میں کشیدگی کم ہونے کے امکانات پیدا ہو سکتے ہیں۔