راولاکوٹ: کالعدم ایکشن کمیٹی کے مسلح جتھوں کا سکیورٹی فورسز اور شہریوں پر حملہ، رینجرز اہلکار شہید

راولاکوٹ: راولاکوٹ میں متیال میرہ بس ٹرمینل کے قریب فائرنگ کے واقعے کے بعد سیکیورٹی فورسز اور مسلح افراد کے درمیان جھڑپ ہوئی، جس کے نتیجے میں ایک رینجرز اہلکار جان کی بازی ہار گیا۔

سرکاری ذرائع کے مطابق 14 جولائی کی صبح مسلح افراد نے شہری آبادی کے قریب فائرنگ کی، جس کے بعد صورتحال پر قابو پانے کے لیے پولیس موقع پر پہنچی۔ بعد ازاں رینجرز کی نفری بھی پولیس کی معاونت کے لیے علاقے میں پہنچی۔

حکام کا کہنا ہے کہ اس دوران سیکیورٹی فورسز پر جدید ہتھیاروں سے فائرنگ کی گئی، جس کے نتیجے میں ایک رینجرز اہلکار شہید ہوگیا۔

سرکاری مؤقف کے مطابق حملے میں کالعدم قرار دی گئی جوائنٹ ایکشن کمیٹی سے وابستہ مسلح گروہ ملوث تھے، جبکہ سیکیورٹی ذرائع کا کہنا ہے کہ واقعے کی تحقیقات جاری ہیں اور علاقے میں امن و امان برقرار رکھنے کے لیے ضروری اقدامات کیے جا رہے ہیں۔

حکام کے مطابق واقعے کے بعد علاقے میں سیکیورٹی مزید سخت کر دی گئی ہے، جبکہ ذمہ دار عناصر کے خلاف قانونی کارروائی جاری ہے۔