کوئٹہ پریس کلب کے باہر احتجاجی کیمپ کی کوشش، گرینڈ الائنس کے تین رہنما گرفتار

کوئٹہ: کوئٹہ پریس کلب کے باہر گرینڈ الائنس کی جانب سے احتجاجی کیمپ لگانے کی کوشش کے دوران پولیس نے کارروائی کرتے ہوئے تین رہنماؤں کو گرفتار کر لیا۔

تفصیلات کے مطابق گرینڈ الائنس کے کارکنان اور رہنما اپنے مطالبات کے حق میں کوئٹہ پریس کلب کے سامنے احتجاجی کیمپ قائم کرنے پہنچے، تاہم پولیس نے کیمپ لگانے سے روک دیا۔ اس دوران پولیس اور مظاہرین کے درمیان تلخ کلامی بھی ہوئی۔

پولیس حکام کے مطابق سرکاری احکامات اور امن و امان کی صورتحال کو مدنظر رکھتے ہوئے کارروائی کی گئی، جبکہ تین رہنماؤں کو حراست میں لے کر متعلقہ تھانے منتقل کر دیا گیا ہے۔

دوسری جانب گرینڈ الائنس کے رہنماؤں نے گرفتاریوں کی مذمت کرتے ہوئے اسے جمہوری حقِ احتجاج پر قدغن قرار دیا اور مطالبہ کیا کہ گرفتار رہنماؤں کو فوری طور پر رہا کیا جائے۔