صوبے کے وسائل عوامی فلاح اور روزگار پر خرچ کریں گے، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی سے پاکستان مسلم لیگ (ن) کے پارلیمانی وفد نے ملاقات کی، جس میں آئندہ مالی سال 2026-27 کے صوبائی بجٹ، ترقیاتی منصوبوں اور صوبے کی مجموعی سیاسی صورتحال پر تفصیلی تبادلہ خیال کیا گیا۔

ملاقات کے دوران صوبائی بجٹ کے اہم خدوخال، ترقیاتی ترجیحات، عوامی فلاحی منصوبوں اور مختلف شعبوں میں سرمایہ کاری کے حوالے سے مشاورت کی گئی۔ شرکاء نے اس امر پر اتفاق کیا کہ بجٹ کو عوامی توقعات اور صوبے کی ضروریات کے مطابق ترتیب دیا جائے تاکہ ترقی کے ثمرات عام آدمی تک پہنچ سکیں۔

اس موقع پر وزیراعلیٰ میر سرفراز بگٹی نے کہا کہ صوبے کے وسائل کو عوام کی فلاح و بہبود، روزگار کے مواقع پیدا کرنے اور بنیادی سہولیات کی فراہمی پر خرچ کیا جائے گا۔ انہوں نے کہا کہ بلوچستان کی پائیدار ترقی، تعلیم، صحت، مواصلات اور انفراسٹرکچر کے شعبوں میں مزید سرمایہ کاری حکومت کی اولین ترجیح ہے۔

وزیراعلیٰ نے کہا کہ اتحادی جماعتوں کی مشاورت سے ایسا متوازن اور عوام دوست بجٹ پیش کیا جائے گا جو عوامی امنگوں کا حقیقی ترجمان اور صوبے کی ترقی و خوشحالی کا ضامن ثابت ہو۔ انہوں نے اس عزم کا اظہار کیا کہ سیاسی استحکام، باہمی مشاورت اور جمہوری روایات کے فروغ کے ذریعے بلوچستان کو ترقی کی نئی منزلوں تک پہنچایا جائے گا۔

ملاقات میں مسلم لیگ (ن) بلوچستان کے پارلیمانی وفد نے صوبائی حکومت کی کارکردگی، ترقیاتی وژن اور عوام دوست پالیسیوں کو سراہتے ہوئے وزیراعلیٰ میر سرفراز بگٹی کی قیادت پر بھرپور اعتماد کا اظہار کیا۔