کبیر بلڈنگ کے قریب زیرِ تعمیر عمارت میں آگ بھڑک اٹھی

شہر میں کبیر بلڈنگ کے قریب واقع ایک زیرِ تعمیر عمارت میں موجود کنسٹرکشن میٹریل، خصوصاً شیٹرنگ کے سامان میں اچانک آگ بھڑک اٹھی، جس سے علاقے میں خوف و ہراس پھیل گیا۔

واقعے کی اطلاع ملتے ہی میٹروپولیٹن فائر بریگیڈ کی ٹیمیں فوری طور پر موقع پر پہنچ گئیں اور پیشہ ورانہ مہارت کا مظاہرہ کرتے ہوئے آگ بجھانے کا عمل شروع کر دیا۔ فائر فائٹرز کی بروقت اور مؤثر کارروائی کے نتیجے میں آگ پر جلد قابو پا لیا گیا اور اسے عمارت کے دیگر حصوں اور قریبی علاقوں تک پھیلنے سے روک دیا گیا۔

ریسکیو حکام کے مطابق آگ سے کسی جانی نقصان کی اطلاع موصول نہیں ہوئی، جبکہ فائر بریگیڈ کی فوری کارروائی کے باعث قریبی آبادی اور املاک کو بھی محفوظ رکھا گیا۔

حکام نے واقعے کی وجوہات جاننے کے لیے مزید تحقیقات شروع کر دی ہیں۔