ڈاکٹر ماہ نور ناصر سے اظہارِ یکجہتی، ینگ ڈاکٹرز کی احتجاجی ریلی

کوئٹہ: لیڈی ڈاکٹر ماہ نور ناصر پر تیزاب گردی کے افسوسناک واقعے کے خلاف اور ان سے اظہارِ یکجہتی کے لیے ینگ ڈاکٹرز ایسوسی ایشن کی جانب سے کوئٹہ میں احتجاجی ریلی نکالی گئی۔ ریلی میں بڑی تعداد میں ڈاکٹرز اور طبی عملے نے شرکت کی اور واقعے کی شدید مذمت کی۔

مظاہرین نے مطالبہ کیا کہ سیکرٹری صحت بلوچستان مجیب الرحمن پانیزئی اور ایم ایس سول ہسپتال کو فوری طور پر عہدوں سے ہٹایا جائے۔ ان کا مؤقف تھا کہ واقعے نے سول ہسپتال کی سیکیورٹی انتظامات پر سنگین سوالات کھڑے کر دیے ہیں اور ذمہ داروں کے خلاف کارروائی ناگزیر ہے۔

ینگ ڈاکٹرز کے رہنماؤں نے کہا کہ اگر سرکاری ہسپتالوں میں ڈاکٹرز اور طبی عملے کو تحفظ فراہم نہیں کیا جا سکتا تو یہ انتہائی تشویشناک صورتحال ہے۔ انہوں نے حکومت بلوچستان سے مطالبہ کیا کہ واقعے کی شفاف تحقیقات کر کے ذمہ داروں کو قانون کے کٹہرے میں لایا جائے اور تمام سرکاری ہسپتالوں میں سیکیورٹی کے مؤثر انتظامات یقینی بنائے جائیں۔

مظاہرین نے ڈاکٹر ماہ نور ناصر کی جلد صحت یابی کے لیے دعا کرتے ہوئے طبی عملے کے تحفظ کے لیے فوری اور عملی اقدامات کا مطالبہ کیا۔