پاکستان کی ثالثی سے مذاکرات میں پیشرفت جاری، امریکا اور ایران میں ڈیل کے امکانات روشن ہیں، ٹرمپ

امریکی صدر ڈونلڈ ٹرمپ نے ایران کے حوالے سے انتہائی سخت اور جارحانہ مؤقف اختیار کرتے ہوئے نہ صرف ایرانی تیل پر کنٹرول حاصل کرنے بلکہ اہم تنصیبات پر آسانی سے قبضے کا دعویٰ کیا ہے، جس کے بعد مشرقِ وسطیٰ میں کشیدگی مزید بڑھ گئی ہے۔

ٹرمپ کا کہنا تھا کہ ایرانی تیل پر قبضہ ان کا پسندیدہ آپشن ہے، اور امریکہ باآسانی ایران کے تیل کے ذخائر پر کنٹرول حاصل کر سکتا ہے۔ انہوں نے خاص طور پر خارگ جزیرے کا ذکر کرتے ہوئے کہا کہ یہ اہم برآمدی مرکز ہے جسے امریکہ آسانی سے اپنے قبضے میں لے سکتا ہے کیونکہ وہاں مؤثر دفاع موجود نہیں۔

انہوں نے مزید دعویٰ کیا کہ آبنائے ہرمز سے گزرنے والے پاکستانی پرچم بردار آئل ٹینکرز کی تعداد، جنہیں ایران نے اجازت دی ہے، بڑھا کر 20 کر دی گئی ہے، جو خطے میں بدلتی ہوئی صورتحال کی عکاسی کرتی ہے۔

دوسری جانب امریکی حکام کے مطابق صدر ٹرمپ ایران کے افزودہ یورینیم ذخائر پر قبضے کے لیے براہ راست فوجی کارروائی کے امکان پر بھی غور کر رہے ہیں۔ یہ ذخائر اصفہان اور نطنز جیسے حساس مقامات پر واقع ہیں، جنہیں حاصل کرنے کے لیے امریکی افواج کو کئی دن تک ایرانی سرزمین پر قیام کرنا پڑ سکتا ہے۔

تاہم ٹرمپ نے یہ بھی واضح کیا کہ پس پردہ سفارتی کوششیں جاری ہیں اور ثالثوں کے ذریعے ایران کے ساتھ مذاکرات میں پیش رفت ہو رہی ہے۔ ان کے مطابق جلد کسی معاہدے تک پہنچنے کا امکان ہے، تاہم فوجی آپشن بھی بدستور زیر غور ہے۔