وزیر اعظم کی موٹر سائیکل اور رکشہ مالکان کو رجسٹریشن کےلیے سہولیات فراہم کرنے کی ہدایت

اسلام آباد: وزیراعظم شہباز شریف کی زیر صدارت، خطے کی موجودہ صورتحال کے پیش نظر ایندھن کی بچت اور کفایت شعاری اقدامات کے نفاذ کا جائزہ اجلاس منعقد ہوا۔

اجلاس میں عوام سے اپیل کی گئی کہ وہ بچت مہم میں حکومت کا ساتھ دیں، غیر ضروری سفر سے گریز کریں اور دفاتر و کام کی جگہوں پر ٹیلی کانفرنسنگ کو ترجیح دیں۔

وزیراعظم نے کہا کہ حکومتی اقدامات کے باعث ملکی پیٹرولیم مصنوعات کی ضروریات پوری کرنے کے لیے مناسب مقدار موجود ہے اور عوامی ریلیف کو موجودہ حالات میں اولین ترجیح دی گئی ہے۔ انہوں نے بتایا کہ گزشتہ تین ہفتوں کے دوران ممکنہ حد تک عوام کو ریلیف فراہم کیا گیا۔

شہباز شریف نے مزید کہا کہ تیل کی قیمتوں میں اضافے کو روکنے کے لیے وفاقی حکومت نے 125 ارب روپے بچت اور ترقیاتی بجٹ میں کٹوتیوں کے ذریعے مختص کیے تاکہ عالمی کشیدگی کے اثرات سے عوام کو محفوظ رکھا جا سکے۔

اجلاس میں صوبائی حکومتوں کو ہدایت کی گئی کہ وہ موٹر سائیکل اور رکشہ مالکان کو رجسٹریشن اپنے نام پر کروانے میں سہولیات فراہم کریں، جس سے ملک بھر میں گاڑیوں کا ڈیٹا ڈیجیٹائز ہوگا اور مالکان مستقبل میں حکومتی ریلیف سے مستفید ہو سکیں گے۔

اجلاس کو بتایا گیا کہ پٹرولیم مصنوعات کی طلب و رسد اور سپلائی چین کی باقاعدہ نگرانی کے لیے ڈیجیٹل ڈیش بورڈ تیار کیا گیا ہے، جبکہ اپریل کے لیے پیٹرول کی درآمد کا انتظام بھی مکمل ہے۔ بریفنگ میں کہا گیا کہ دیگر ممالک کے برعکس پاکستان میں ایندھن کی فراہمی معمول کے مطابق ہے اور کہیں لمبی قطاریں یا بدانتظامی نہیں۔

اجلاس میں موٹر سائیکل اور رکشہ سواروں کے لیے مجوزہ فیول سپورٹ پروگرام کی ایپ پر بھی بریفنگ دی گئی، جبکہ نائب وزیراعظم اسحاق ڈار سمیت وفاقی وزراء اور متعلقہ حکام نے ویڈیو لنک کے ذریعے شرکت کی۔