پاکستان، مصر اور ترکیہ کے وزرائے خارجہ کی اسلام آباد میں ملاقات، خطے کی کشیدہ صورتحال پر اہم مشاورت

اسلام آباد: نائب وزیراعظم اور وزیر خارجہ اسحاق ڈار نے وزارت خارجہ پہنچنے پر برادر ممالک کے وزرائے خارجہ کا استقبال کیا اور خطے کی کشیدہ صورتحال پر مشاورت کی۔

نائب وزیرِ اعظم و وزیر خارجہ اسحاق ڈار نے دفتر خارجہ میں جمہوریہ ترکیہ کے وزیر خارجہ ہاکان فدان سے ملاقات کی، جس میں دونوں ممالک کے تاریخی، برادرانہ اور مضبوط تعلقات کو اجاگر کیا گیا۔ انہوں نے دوطرفہ تعلقات میں مثبت پیش رفت پر اطمینان کا اظہار کیا اور مختلف شعبوں میں تعاون کو مزید فروغ دینے کے عزم کا اعادہ کیا۔

ملاقات میں پاک ترک وزرائے خارجہ نے خطے کی موجودہ صورتحال، خاص طور پر ایران کی صورت حال پر تفصیلی تبادلہ خیال کیا اور امن و استحکام کے لیے مذاکرات اور سفارتی رابطوں کی اہمیت پر زور دیا۔ دونوں رہنماؤں نے اپنے بنیادی قومی مفادات کی غیر متزلزل حمایت اور دوطرفہ اسٹریٹجک شراکت داری کو مزید مستحکم کرنے پر اتفاق کیا۔

اس کے علاوہ، نائب وزیرِ اعظم اسحاق ڈار نے وزارت خارجہ آمد پر مصر کے وزیر خارجہ ڈاکٹر بدر عبدالعاطی کا بھی خیرمقدم کیا۔ دونوں رہنماؤں نے دوطرفہ تعلقات کے تمام پہلوؤں کا جامع جائزہ لیا اور حالیہ اعلیٰ سطح تبادلوں، بالخصوص نومبر 2025 میں مصر کے وزیر خارجہ کے دورہ پاکستان کے بعد پیش رفت پر اطمینان ظاہر کیا۔

ملاقات میں تجارت اور سرمایہ کاری میں اضافے، دوطرفہ وزارتی کمیشن کے فعال ہونے، کاروباری اداروں کے روابط اور صحت کے شعبے میں جاری تعاون، خاص طور پر ہیپاٹائٹس سی کے انسداد کے حوالے سے مصر کی معاونت کو سراہا گیا۔ دونوں وزراء نے دفاعی و سلامتی کے شعبوں میں تربیتی تبادلوں اور ادارہ جاتی تعاون کو مزید مستحکم بنانے پر اتفاق کیا۔

خطے کی کشیدہ صورتحال اور مشرقِ وسطیٰ کے بحران پر بات کرتے ہوئے، دونوں رہنماؤں نے تحمل، کشیدگی میں کمی اور سفارت کاری کے ذریعے تنازعات کے حل کی اہمیت پر زور دیا۔ انہوں نے فلسطینی عوام کی حمایت اور غزہ و مغربی کنارے میں اسرائیلی افواج کی جارحیت کی شدید مذمت کی، اور انسانی امداد فراہم کرنے میں مصر کے کردار کو سراہا۔

آخر میں، پاکستان اور مصر نے اقوامِ متحدہ، اسلامی تعاون تنظیم اور دیگر کثیرالجہتی فورمز پر قریبی تعاون جاری رکھنے اور دوطرفہ تعلقات کو مزید مستحکم کرنے کا عزم دہرایا۔