بلوچستان ہائیکورٹ نے عبدالمجید اچکزئی کی بریت کالعدم قرار دے کر 10 سال قید کی سزا سنا دی

کوئٹہ: بلوچستان ہائیکورٹ نے ٹریفک سب انسپکٹر حاجی عطااللہ کی ہلاکت کے مقدمے میں سابق رکن اسمبلی عبدالمجید اچکزئی کی بریت کے خلاف سرکاری اپیل منظور کرتے ہوئے انہیں 10 سال قیدِ بامشقت کی سزا سنا دی۔

جسٹس محمد عامر نواز رانا اور جسٹس عبدالقیوم لہڑی پر مشتمل ڈویژنل بینچ نے 4 ستمبر 2020 کو سنایا گیا بریت کا فیصلہ کالعدم قرار دے دیا۔

عدالت نے عبدالمجید اچکزئی کو تعزیراتِ پاکستان کی دفعہ 320 کے تحت مجرم قرار دیتے ہوئے مقتول کے قانونی ورثا کو دیت کی رقم ادا کرنے کا بھی حکم دیا۔

عدالت نے عبدالمجید اچکزئی کے ناقابلِ ضمانت وارنٹ گرفتاری جاری کرنے اور انہیں فوری گرفتار کرکے سزا بھگتنے کے لیے جیل منتقل کرنے کی ہدایت بھی کردی۔