چیف جسٹس پاکستان اور چیف جسٹس وفاقی آئینی عدالت کو بیرون ملک دوروں کی اجازت مل گئی

اسلام آباد (ویب ڈیسک) صدر مملکت آصف علی زرداری نے وزیراعظم کی سفارش پر چیف جسٹس پاکستان اور چیف جسٹس وفاقی آئینی عدالت کے بیرون ملک دوروں کی منظوری دے دی ہے۔ دونوں اعلیٰ عدالتی عہدیدار اکتوبر اور نومبر میں مختلف ممالک کا دورہ کریں گے۔

ایوان صدر کی جانب سے جاری اعلامیے کے مطابق چیف جسٹس پاکستان کو برطانیہ، جنوبی کوریا اور جاپان کے دوروں کے لیے این او سی جاری کرنے کے ساتھ بیرون ملک قیام کے دوران رخصت کی اجازت بھی دے دی گئی ہے۔ ان دوروں کے لیے 14 سے 21 اکتوبر اور 27 اکتوبر سے 4 نومبر 2026 کی تاریخیں مقرر کی گئی ہیں۔

اعلامیے کے مطابق صدر مملکت نے چیف جسٹس وفاقی آئینی عدالت پاکستان کے دورہ آذربائیجان کی بھی منظوری دی ہے۔ وہ 19 سے 22 اکتوبر 2026 تک آذربائیجان میں منعقد ہونے والی ترک دنیا کی آئینی عدالتوں اور آئینی دائرہ اختیار رکھنے والے اداروں کی کانفرنس میں شرکت کریں گے۔

ایوان صدر کے مطابق دونوں عدالتی سربراہان کے بیرون ملک دوروں کی منظوری وزیراعظم کے مشورے پر دی گئی ہے، جبکہ اس حوالے سے باضابطہ اعلامیہ بھی جاری کردیا گیا ہے۔