الحمرا آرٹس کونسل میں عاصمہ بٹ اور ٹیم کی شاندار تھیٹر پرفارمنس، شائقین کے دل جیت لیے

اسلام آباد (نزاکت علی چوہان سے) معروف فنکارہ، چیئرپرسن ڈولفن کمیونیکیشن کلچر ونگ و نیشنل پیس کونسل، عاصمہ بٹ اور ان کی پوری ٹیم نے الحمرا آرٹس کونسل میں ایک یادگار اور شاندار تھیٹر پرفارمنس پیش کر کے شائقین کے دل جیت لیے۔تفصیلات کے مطابق یہ تھیٹر شو تاریخ، علم، تفریح اور بامقصد سبق آموز پیغام کا بہترین امتزاج تھا جسے حاضرین کی جانب سے بے حد سراہا گیا۔ پرفارمنس کے دوران ہر فنکار نے اپنی جاندار اداکاری سے کردار میں حقیقت کا رنگ بھر دیا جس پر ہال تالیوں سے گونج اٹھا۔ تقریب کے مہمانِ خصوصی مرکزی چیئرمین نیشنل پیس کونسل و انٹرنیشنل اوورسیز اکنامک کوریڈور (IOEC) چوہدری غلام مصطفیٰ تھے۔ انہوں نے اس موقع پر فنون و ثقافت کے فروغ کے لیے عاصمہ بٹ کی شاندار خدمات کو سراہتے ہوئے انہیں اور ان کی پوری ٹیم کو تعریفی شیلڈز پیش کیں۔ اس موقع پر چیئرمین مائنورٹی ونگ سلیم سوریہ اور ان کی پوری ٹیم نے بھی خصوصی شرکت کی اور فنکاروں کی شاندار کارکردگی کو سراہتے ہوئے ان کی حوصلہ افزائی کی۔ ان کی شرکت نے تقریب کو چار چاند لگا دیے اور بین المذاہب ہم آہنگی و ثقافتی یکجہتی کا خوبصورت پیغام دیا۔ اپنے خطاب میں چیئرمین چوہدری غلام مصطفیٰ نے کہا کہ یہ شو اس بات کی روشن مثال ہے کہ تھیٹر کس طرح تاریخ، علم اور تفریح کو یکجا کر کے نوجوان نسل کو قیمتی اسباق دیتا ہے۔ NPCP اور IOEC کی جانب سے اس شاندار کارکردگی پر شیلڈ پیش کرنا میرے لیے باعثِ فخر اور اعزاز ہے۔آخر میں انہوں نے عاصمہ بٹ اور ان کی ٹیم کو دلی مبارکباد پیش کرتے ہوئے مستقبل میں مزید کامیابیوں کے لیے نیک خواہشات کا اظہار کیا۔