حکومت اور اپوزیشن کی رسہ کشی ملک کے مفاد میں نہیں، سید امان شاہ

کوئٹہ (پ ر) عوام پاکستان پارٹی بلوچستان کے صوبائی صدر سید امان شاہ نے حکومت اور اپوزیشن کے درمیان جاری رسہ کشی اور سیاسی محاذ آرائی کو ملک کے لیے نقصان دہ قرار دیتے ہوئے کہا ہے کہ پاکستان اس وقت سیاسی، معاشی اور امن و امان سمیت متعدد سنگین مسائل سے دوچار ہے، ایسے حالات میں سیاسی قوتوں کا باہمی کشمکش میں الجھنا ملکی مفاد میں نہیں۔ انہوں نے کہا کہ حکومت اور اپوزیشن دونوں کو اپنی اپنی سیاسی پوزیشن سے بالاتر ہوکر ملک و قوم کے وسیع تر مفاد کو مقدم رکھنا ہوگا۔ سیاسی اختلاف جمہوری نظام کا حصہ ہے، تاہم اختلافات کو ذاتی انا، ضد اور محاذ آرائی کی شکل دینا ملک کو مزید بحرانوں کی طرف لے جا سکتا ہے۔ سید امان شاہ نے کہا کہ موجودہ حالات میں سیاسی قوتوں کے درمیان مذاکرات اور افہام و تفہیم کا راستہ اختیار کرنا وقت کی اہم ضرورت ہے۔ تمام معاملات کو آئین، قانون اور جمہوری اصولوں کے مطابق مذاکرات کی میز پر حل کیا جائے تاکہ ملک میں سیاسی استحکام پیدا ہو اور حکومت اپنی توجہ عوام کو درپیش مہنگائی، بے روزگاری، معاشی مشکلات اور امن و امان کے مسائل کے حل پر مرکوز کرسکے۔انہوں نے کہا کہ عوام پہلے ہی مشکلات کا شکار ہیں، انہیں سیاسی محاذ آرائی نہیں بلکہ روزگار، معاشی استحکام، امن اور بہتر مستقبل کی ضرورت ہے۔حکومت اور اپوزیشن کو عوام کی مشکلات کا احساس کرتے ہوئے باہمی اختلافات کم اور قومی مسائل کے حل کے لیے مشترکہ لائحہ عمل اختیار کرنا چاہیے۔