نواز شریف، شہباز شریف اور مریم نواز سے آزاد کشمیر کے وزیراعظم اور اسپیکر کی ملاقات

لاہور: پاکستان مسلم لیگ (ن) کے صدر محمد نواز شریف، وزیراعظم شہباز شریف اور وزیراعلیٰ پنجاب مریم نواز شریف سے آزاد جموں و کشمیر کے وزیراعظم افتخار گیلانی اور اسپیکر طارق فاروق نے ملاقات کی۔

ملاقات کے دوران آزاد کشمیر کے وزیراعظم اور اسپیکر نے مسلم لیگ (ن) کی اعلیٰ قیادت کی جانب سے اعتماد کے اظہار پر شکریہ ادا کیا، جبکہ نواز شریف، شہباز شریف اور مریم نواز نے انہیں مبارکباد اور نیک تمناؤں کا اظہار کیا۔

ملاقات میں آزاد کشمیر کی مجموعی صورتحال، عوامی مسائل اور ترقیاتی امور پر تبادلہ خیال کیا گیا۔ مسلم لیگ (ن) کی قیادت نے آزاد کشمیر کے عوام کے مسائل کے فوری حل اور صحت، تعلیم، صفائی اور انفراسٹرکچر سمیت مختلف شعبوں میں بہتری لانے پر زور دیا۔

نواز شریف نے آزاد کشمیر کو پنجاب کی طرز پر جدت اور ترقی کی راہ پر گامزن کرنے کی ہدایت کرتے ہوئے وزیراعظم آزاد کشمیر کے ساتھ پہلے 100 دنوں پر مشتمل اصلاحاتی منصوبہ بھی شیئر کیا۔

دریں اثنا وزیراعظم شہباز شریف نے رائیونڈ میں نواز شریف سے بھی ملاقات کی، جس میں اہم ملکی امور پر تبادلہ خیال کیا گیا۔