وزیراعظم سے سعودی وزیر ماحولیات کی ملاقات، پاکستان کے زرعی ماہرین کا جلد ریاض دورے کا امکان

اسلام آباد: وزیراعظم محمد شہباز شریف سے سعودی عرب کے وزیر ماحولیات، پانی و زراعت انجینئر عبدالرحمن بن عبدالمحسن الفضلی نے وزیراعظم ہاؤس میں ملاقات کی، جس میں دوطرفہ تعلقات، زرعی تعاون، پانی کے وسائل اور غذائی تحفظ سمیت مختلف امور پر تبادلہ خیال کیا گیا۔

وزیراعظم نے پاکستان اور سعودی عرب کے درمیان برادرانہ اور اسٹریٹجک تعلقات کو مزید مضبوط بنانے کی ضرورت پر زور دیتے ہوئے کہا کہ دونوں ممالک کو اقتصادی اور زرعی شعبوں میں تعاون بڑھانا چاہیے۔

ملاقات کے دوران وزیراعظم نے پاکستان سے سعودی عرب کو زرعی مصنوعات کی برآمد کے حوالے سے جاری مثبت تعاون پر اطمینان کا اظہار کیا۔ انہوں نے زرعی پیداوار میں اضافے کے لیے جدید ٹیکنالوجی، تحقیق و ترقی اور پانی کے مؤثر استعمال کے شعبوں میں تعاون بڑھانے پر بھی زور دیا۔

وزیراعظم نے اعلان کیا کہ پاکستانی زرعی ماہرین کا وفد جلد ریاض کا دورہ کرے گا، جہاں دونوں ممالک کے درمیان زرعی تعاون کو مزید فروغ دینے کے لیے اہم امور پر بات چیت ہوگی۔

سعودی وزیر ماحولیات نے پاکستان کے پرتپاک استقبال پر وزیراعظم کا شکریہ ادا کرتے ہوئے زراعت، پانی اور غذائی تحفظ کے شعبوں میں تعاون مزید بڑھانے کے سعودی عزم کا اعادہ کیا۔