غیرت کے نام پر قتل؛ لاہور ہائی کورٹ کا بڑا فیصلہ جاری

لاہور: لاہور ہائیکورٹ نے غیرت کے نام پر قتل کے مقدمے میں اہم فیصلہ جاری کرتے ہوئے ملزمان کی ضمانت کی درخواستیں مسترد کردیں اور قرار دیا کہ غیرت کے نام پر قتل ناقابلِ راضی نامہ جرم ہے۔

جسٹس سید فرہاد علی شاہ نے فیصلے میں کہا کہ قانون کسی شخص کو غیرت کے نام پر کسی کی جان لینے کی اجازت نہیں دیتا، جبکہ نہ آئین اور نہ ہی مذہب ایسے اقدام کی حمایت کرتا ہے۔

عدالت کے مطابق ملزمان محمد ناصر اور پرویز پر 18 سالہ نجمہ مائی کو غیرت کے نام پر فائرنگ کرکے قتل کرنے کا الزام ہے۔ عدالت نے واضح کیا کہ فریقین کے درمیان ہونے والا سمجھوتا ملزمان کو ضمانت کا قانونی حق فراہم نہیں کرتا۔

فیصلے میں کہا گیا کہ غیرت کے نام پر قتل آئین کے آرٹیکل 9 میں دیے گئے حقِ زندگی اور آزادی سے متصادم ہے، جبکہ ایسے رسم و رواج جو بنیادی حقوق کے خلاف ہوں انہیں آئینی تحفظ حاصل نہیں ہوسکتا۔

لاہور ہائیکورٹ نے قرار دیا کہ تعزیرات پاکستان کی دفعہ 311 کے تحت غیرت کے نام پر قتل ناقابلِ راضی نامہ جرم ہے، اس لیے مدعی یا گواہوں کے بیانات سے منحرف ہونے کے حلف نامے بھی ضمانت دینے کے لیے کافی نہیں۔

عدالت نے راضی نامے کی بنیاد پر ریلیف دینے سے انکار کرتے ہوئے دونوں ملزمان کی ضمانت کی درخواستیں خارج کردیں۔