جب آپ یو اے ای میں رہ کر اسی کے خلاف فریق بنیں گے تو وہ ردعمل تو دے گا، خواجہ آصف

اسلام آباد: وزیر دفاع خواجہ آصف نے کہا ہے کہ اگر کوئی شخص کسی ملک میں رہ کر اسی کے خلاف فریق بننے کی کوشش کرے گا تو اس کا ردعمل سامنے آتا ہے۔

قومی اسمبلی کے اجلاس میں تحریک انصاف کی جانب سے یو اے ای میں پاکستانیوں کو درپیش مبینہ مسائل کے معاملے پر اظہارِ خیال کرتے ہوئے خواجہ آصف نے کہا کہ وہ متحدہ عرب امارات میں 12 سے 14 سال رہ چکے ہیں اور وہاں پاکستانیوں کے حالات سے واقف ہیں۔

انہوں نے کہا کہ حالیہ جنگ کے دوران کچھ لوگوں نے فریق بننے کی کوشش کی، جس پر ردعمل آیا۔

اس سے قبل پی ٹی آئی رہنماؤں نے یو اے ای میں پاکستانیوں کے ویزوں اور سفری مسائل کا معاملہ ایوان میں اٹھایا۔ بیرسٹر گوہر نے کہا کہ یو اے ای پاکستان کا دوست ملک ہے، تاہم حالیہ صورتحال کے بعد پیدا ہونے والے مسائل پر پارلیمان کو اعتماد میں لیا جائے۔

اسد قیصر نے بھی کہا کہ یو اے ای کی ترقی میں پاکستانیوں کا اہم کردار ہے اور متعلقہ معاملات اماراتی حکام کے سامنے اٹھائے جانے چاہئیں۔

دوسری جانب خواجہ آصف نے مکہ امن معاہدے سے متعلق ایوان کو بریفنگ دینے کا بھی اعلان کیا۔