عمران خان کی اسپتال منتقلی کا حکم، اسپتال کو سب جیل قرار دیا جاسکتا ہے، جیل ذرائع

اسلام آباد: سپریم کورٹ کے حکم کے بعد پاکستان تحریک انصاف (پی ٹی آئی) کے بانی عمران خان کو اڈیالہ جیل سے اسلام آباد کے نجی اسپتال منتقل کرنے کے معاملے پر انتظامات شروع کر دیے گئے ہیں۔

جیل ذرائع کے مطابق سپریم کورٹ کا تحریری حکم نامہ تاحال جیل انتظامیہ کو موصول نہیں ہوا، تاہم حکم نامہ ملنے کے بعد تمام ضروری اقدامات کیے جائیں گے۔

ذرائع کا کہنا ہے کہ عمران خان کی منتقلی کی صورت میں متعلقہ اسپتال کو سب جیل قرار دیا جا سکتا ہے، جس کا اختیار انتظامیہ کے پاس ہے۔ اسپتال کو سب جیل قرار دیے جانے کی صورت میں اڈیالہ جیل کا عملہ بھی عمران خان کے ساتھ تعینات کیا جائے گا۔

ذرائع کے مطابق عملے میں ڈپٹی سپرنٹنڈنٹ، اسسٹنٹ سپرنٹنڈنٹس، خانساماں اور دیگر اہلکار شامل ہوں گے، جبکہ عمران خان اسپتال میں قیام کے دوران بھی جیل حکام کی نگرانی میں رہیں گے۔

جیل ذرائع کے مطابق اسپتال کی اندرونی سیکیورٹی جیل پولیس جبکہ بیرونی سیکیورٹی اسلام آباد پولیس کے ذمہ ہوگی۔ عمران خان پر جیل مینوئل کے مطابق قواعد و ضوابط لاگو رہیں گے۔

واضح رہے کہ سپریم کورٹ نے عمران خان کو طبی معائنے اور علاج کے لیے اسلام آباد کے نجی اسپتال منتقل کرنے کا حکم دیا تھا۔