وزیراعظم شہباز شریف کی امریکا اور ایران کو دعوت، مذاکرات 10 اپریل کو اسلام آباد میں ہوں گے

اسلام آباد: وزیرِ اعظم شہباز شریف نے کہا ہے کہ ایران اور امریکا نے اپنے اتحادیوں کے ساتھ مل کر لبنان سمیت مختلف خطوں میں فوری جنگ بندی پر اتفاق کر لیا ہے، جو خطے میں امن کے قیام کی جانب ایک اہم پیش رفت ہے۔

انہوں نے بتایا کہ یہ جنگ بندی فوری طور پر نافذ العمل ہو چکی ہے اور اس سے خطے میں کشیدگی میں نمایاں کمی آئے گی۔ وزیرِ اعظم نے اس فیصلے کا خیرمقدم کرتے ہوئے دونوں ممالک کی قیادت کا شکریہ ادا کیا اور اسے دانشمندی اور دور اندیشی کا مظہر قرار دیا۔

وزیرِ اعظم شہباز شریف کے مطابق ایران اور امریکا کے وفود کو 10 اپریل 2026 کو اسلام آباد مدعو کیا گیا ہے، جہاں تنازعات کے حتمی حل کے لیے مذاکرات ہوں گے۔

انہوں نے کہا کہ دونوں فریقین نے غیر معمولی فہم و فراست کا مظاہرہ کیا ہے اور امن و استحکام کے فروغ میں مثبت کردار ادا کیا ہے۔

وزیرِ اعظم نے امید ظاہر کی کہ اسلام آباد میں ہونے والے مذاکرات پائیدار امن کے حصول میں اہم سنگِ میل ثابت ہوں گے اور مستقبل میں مزید مثبت پیش رفت سامنے آئے گی۔