ملازمین کے لیے ریٹائرمنٹ کے بعد مستقل آمدن کے نئے ذرائع متعارف

ملازمین کو ریٹائرمنٹ کے بعد مالی تحفظ فراہم کرنے کے لیے نئی آمدنی اسکیمیں متعارف کرا دی گئی ہیں۔

تفصیلات کے مطابق Securities and Exchange Commission of Pakistan (ایس ای سی پی) نے ریٹائرمنٹ کے بعد مستقل آمدن کے ذرائع فراہم کرنے کے لیے نئی اینیوٹی مصنوعات کی منظوری دے دی ہے۔

ادارے کے مطابق لائف کنٹنجنٹ، ڈیفرڈ اور گارنٹیڈ پیمنٹ اینیوٹیز متعارف کرائی گئی ہیں جن کا مقصد ریٹائرمنٹ کے بعد افراد کو مالی استحکام فراہم کرنا ہے۔

ایس ای سی پی کا کہنا ہے کہ ہائبرڈ اینیوٹی اسکیمیں عمر بھر آمدن اور یقینی ادائیگیوں کی سہولت فراہم کریں گی، جبکہ ریٹائرڈ افراد اپنی جمع شدہ بچت کو مستقل ماہانہ آمدن میں تبدیل کر سکیں گے۔

ادارے کے مطابق نئی اینیوٹی مصنوعات مہنگائی اور اوسط عمر میں اضافے کے باعث پیدا ہونے والے مالی مسائل کو کم کرنے میں مددگار ثابت ہوں گی۔

ایس ای سی پی نے بتایا کہ یہ اینیوٹی مصنوعات روایتی انشورنس اور تکافل دونوں نظام کے تحت دستیاب ہوں گی، اور اس اقدام کے ذریعے پاکستان کے ریٹائرمنٹ سسٹم کو مزید مستحکم اور معیاری بنانے کی کوشش کی جا رہی ہے۔