ٹرمپ نے سیاسی انتقام لینے اور دھمکیاں دینے پر ڈیموکریٹس کے خلاف تحقیقات کا حکم دے دیا

واشنگٹن: امریکی صدر ڈونلڈ ٹرمپ نے ڈیموکریٹک رہنماؤں پر سیاسی انتقام لینے، ری پبلکن رہنماؤں اور ان کے حامیوں کو جیل بھیجنے کی دھمکیاں دینے اور قانون کو سیاسی مخالفین کے خلاف استعمال کرنے کا الزام عائد کرتے ہوئے محکمہ انصاف کو فوری تحقیقات کا حکم دینے کا اعلان کیا ہے۔

اپنے بیان میں ڈونلڈ ٹرمپ نے کہا کہ ڈیموکریٹس متعدد افراد کو مواخذے اور مختلف سزاؤں کی دھمکیاں دے رہے ہیں، جبکہ اٹارنی جنرل سمیت کئی شخصیات کے خلاف مواخذے کی دھمکیاں بھی بلاجواز ہیں۔

امریکی صدر نے ڈیموکریٹس کے طرزِ عمل کو اعلیٰ سطح کی بھتہ خوری قرار دیتے ہوئے کہا کہ انہیں اپنے اقدامات پر جوابدہ ہونا چاہیے۔ ان کا الزام تھا کہ ری پبلکن ڈونرز کو سیاسی وابستگی کی بنیاد پر نشانہ بنایا جا رہا ہے اور ری پبلکن رہنماؤں و حامیوں کو جیل بھیجنے کی دھمکیاں دی جا رہی ہیں۔

ٹرمپ نے سینیٹر ایلیسا سلاٹکن کا حوالہ دیتے ہوئے الزام لگایا کہ وہ ری پبلکن نظریات رکھنے والے نوجوانوں کو بھی نشانہ بنانے کی بات کر رہی ہیں۔ ان کے مطابق سزا ان افراد کو ملنی چاہیے جو دوسروں کو غیر قانونی دھمکیاں دے رہے ہیں۔

ڈونلڈ ٹرمپ نے مزید دعویٰ کیا کہ ڈیموکریٹک رہنماؤں نے بے گناہ افراد کو دھمکی آمیز خطوط بھیجے ہیں۔ انہوں نے کہا کہ محکمہ انصاف کو ڈیموکریٹس کے مبینہ مجرمانہ اقدامات کی فوری تحقیقات کا حکم دے رہے ہیں۔