کولہی اسٹوڈنٹس ایسوسی ایشن کا اجلاس، دیہات میں تعلیمی آگاہی مہم چلانے کا فیصلہ

ڈگری (عباس آرائیں) کولہی اسٹوڈنٹس ایسوسی ایشن تعلقہ ڈگری کا اجلاس تعلقہ صدر لچھمن راٹھوڑ کی صدارت میں منعقد ہوا، جس میں کولہی اسٹوڈنٹس ایسوسی ایشن کے مرکزی رہنما کامریڈ پریم راٹھوڑ کولہی، کشور راٹھوڑ کولہی، ایڈووکیٹ ٹیکمداس کولہی، ہتیش راٹھوڑ کولہی، چھیمراج کولہی، کھیم چند کولہی اور گیان چند کولہی نے شرکت کی۔ اجلاس میں تعلیم کی اہمیت، طلبہ کو درپیش مسائل اور کولہی برادری میں تعلیمی شعور بیدار کرنے کے حوالے سے تفصیلی تبادلۂ خیال کیا گیا۔ اجلاس میں فیصلہ کیا گیا کہ تعلقہ ڈگری کے مختلف دیہات میں تعلیمی آگاہی پروگرام منعقد کیے جائیں گے، جن کے ذریعے والدین اور طلبہ کو تعلیم کی اہمیت، بچوں کے اسکولوں میں داخلے اور ان کی تعلیم جاری رکھنے کے حوالے سے آگاہی فراہم کی جائے گی اس موقع پر رہنماؤں نے کہا کہ تعلیم ہی ترقی، خوشحالی اور روشن مستقبل کی ضمانت ہے۔ برادری کی ترقی کے لیے ضروری ہے کہ ہر بچے کو تعلیم کے یکساں مواقع فراہم کیے جائیں اور والدین میں تعلیم کی اہمیت کے حوالے سے شعور پیدا کیا جائے انہوں نے مزید کہا کہ کولہی برادری کے ہر بچے تک تعلیم کی روشنی پہنچانے کے لیے مشترکہ کوششیں جاری رکھی جائیں گی، جبکہ دیہات میں تعلیمی آگاہی مہم کے ذریعے بچوں کو تعلیم کی طرف راغب کرنے کے لیے عملی اقدامات کیے جائیں گے۔