اہلِ بیت اطہار سے محبت و عقیدت ایمان کا قیمتی سرمایہ ہے، الحاج میاں خالد مقبول عباسی

حضرت امام حسنؓ اور امام حسینؓ کی سیرت و قربانیاں پوری امتِ مسلمہ کے لیے مشعلِ راہ ہیں، اہلِ بیت کی تعلیمات پر عمل پیرا ہونا ہماری دینی و اخلاقی ذمہ داری ہے۔

بہاولنگر(محمد اشفاق وٹو)سعودی عرب میں مقیم معروف علمی و سماجی شخصیت الحاج میاں خالد مقبول عباسی نے کہا ہے کہ اہلِ بیت اطہار سے محبت، عقیدت اور احترام ہر مسلمان کے دل کا قیمتی سرمایہ ہے۔ حضرت امام حسن رضی اللہ عنہ اور حضرت امام حسین رضی اللہ عنہ جنت کے نوجوانوں کے سردار ہیں، جن کی سیرتِ طیبہ، عظیم قربانیاں اور دینِ اسلام کے لیے لازوال خدمات پوری امتِ مسلمہ کے لیے مشعلِ راہ ہیں۔
انہوں نے کہا کہ نبی کریم حضرت محمد مصطفیٰ صلی اللہ علیہ وآلہ وسلم کے اہلِ بیت اطہار سے محبت و عقیدت رکھنا، ان کا احترام کرنا اور ان کی تعلیمات سے رہنمائی حاصل کرنا ہر مسلمان کی دینی و اخلاقی ذمہ داری ہے۔ اہلِ بیت اطہار کی سیرت ہمیں صبر، ایثار، حق گوئی، اخوت اور دین سے وفاداری کا درس دیتی ہے۔
الحاج میاں خالد مقبول عباسی نے مزید کہا کہ ہمیں اہلِ بیت اطہار کی تعلیمات کو اپنی عملی زندگی کا حصہ بناتے ہوئے معاشرے میں محبت، رواداری، اتحاد و اتفاق اور بھائی چارے کو فروغ دینا چاہیے تاکہ ایک پُرامن اور مثالی معاشرے کی تشکیل ممکن ہو سکے۔