روہڑی میونسپل کمیٹی میں مبینہ بدعنوانیوں کے باعث نکاسیٔ آب کا نظام متاثر، گندا پانی سڑکوں پر جمع ہونے لگا

سکھر (رپورٹ: اسلم سومرو) روہڑی میونسپل کمیٹی کے زیرِ انتظام مختلف علاقوں میں نکاسیٔ آب کا نظام متاثر ہونے کے باعث شہریوں کو شدید مشکلات کا سامنا ہے۔ پرانی اور خستہ حال نالیوں کے باعث گندا پانی گلیوں اور سڑکوں پر جمع ہونے لگا ہے، جس سے آمدورفت متاثر ہونے کے ساتھ شہریوں کی روزمرہ زندگی بھی مشکلات کا شکار ہے شہریوں کے مطابق متعدد علاقوں میں برسوں پرانی نالیوں کی مرمت، صفائی ستھرائی اور نکاسیٔ آب کے مؤثر انتظامات نہ ہونے کے باعث صورتحال مسلسل خراب ہو رہی ہے۔ گندا پانی جمع ہونے سے پیدل چلنے والوں اور دیگر شہریوں کو دشواری کا سامنا کرنا پڑ رہا ہے، جبکہ متعلقہ حکام کی جانب سے مسئلے کے مستقل حل کے لیے مؤثر اقدامات کی ضرورت ہے دوسری جانب شہری حلقوں نے میونسپل کمیٹی روہڑی کی کارکردگی اور ترقیاتی اخراجات پر سوالات اٹھاتے ہوئے مبینہ بدعنوانیوں کی شفاف تحقیقات کا مطالبہ کیا ہے۔ شہریوں کا کہنا ہے کہ بلدیاتی وسائل کو شفاف اور مؤثر انداز میں استعمال کیا جائے اور ترقیاتی منصوبوں کی مناسب نگرانی یقینی بنائی جائے تو نکاسیٔ آب سمیت بنیادی شہری مسائل حل کیے جا سکتے ہیں شہریوں نے اعلیٰ حکام اور متعلقہ اداروں سے مطالبہ کیا ہے کہ روہڑی میں نکاسیٔ آب کی خراب صورتحال کا فوری نوٹس لیا جائے، خستہ حال نالیوں کی مرمت اور تعمیرِ نو کرائی جائے، گندے پانی کی نکاسی کے لیے ہنگامی بنیادوں پر اقدامات کیے جائیں اور میونسپل کمیٹی میں مبینہ بدعنوانیوں کے الزامات کی غیر جانب دارانہ تحقیقات کرائی جائیں، تاکہ ذمہ داروں کا تعین ہو سکے اور شہریوں کو درپیش مسائل کا مستقل حل نکالا جا سکے۔