کوئٹہ: ویٹرنری ریسرچ سینٹر کی نئی عمارت مقررہ مدت میں مکمل کی جائے، میر فیصل خان جمالی

صوبائی وزیر لائیو اسٹاک سردارزادہ میر فیصل خان جمالی نے ویٹرنری ریسرچ سینٹر کوئٹہ کا تفصیلی دورہ کیا، جہاں سیکرٹری لائیو اسٹاک محمد صالح بلوچ اور ڈائریکٹر جنرل ریسرچ ڈاکٹر محمد موسیٰ بھی ان کے ہمراہ تھے۔ دورے کے موقع پر صوبائی وزیر کو سینٹر کے مختلف شعبہ جات، جدید لیبارٹریز اور جاری تحقیقی منصوبوں سے متعلق تفصیلی بریفنگ دی گئی۔صوبائی وزیر سردارزادہ میر فیصل خان جمالی نے سینٹر میں زیرِ تعمیر عمارت کا خصوصی معائنہ کرتے ہوئے جاری تعمیراتی کام کی رفتار اور معیار کا جائزہ لیا۔ اس موقع پر متعلقہ انجینئرز اور ٹھیکیدار نے تعمیراتی منصوبے کی پیش رفت اور مختلف مراحل کے حوالے سے انہیں آگاہ کیا۔صوبائی وزیر نے متعلقہ حکام کو ہدایت کی کہ تعمیراتی کام میں معیار پر کسی قسم کا سمجھوتہ برداشت نہیں کیا جائے گا اور منصوبے کو مقررہ مدت کے اندر مکمل کیا جائے تاکہ تحقیقی سہولیات کو جلد فعال اور مزید مو¿ثر بنایا جا سکے۔سردارزادہ میر فیصل خان جمالی نے اس امر پر زور دیا کہ ویٹرنری ریسرچ سینٹر کی استعدادِ کار میں اضافہ وقت کی اہم ضرورت ہے۔ نئی عمارت کی تکمیل سے تحقیقی سرگرمیوں کو فروغ ملے گا، مویشیوں کی صحت سے متعلق سہولیات میں بہتری آئے گی اور بلوچستان بھر کے مالداروں کو براہِ راست فائدہ پہنچے گا۔انہوں نے متعلقہ حکام پر زور دیا کہ تحقیقی اداروں کی بہتری، تعمیراتی منصوبوں کی بروقت تکمیل اور لائیو اسٹاک کے شعبے میں جدید سہولیات کی فراہمی کو یقینی بنایا جائے تاکہ صوبے کی معیشت میں اہم کردار ادا کرنے والے شعبہ مال مویشی کو مزید مستحکم کیا جا سکے۔