احتجاج اور دھرنے ختم کریں، ہمارے دروازے کھلے ہیں، وزیراعظم کی پی ٹی آئی کو مذاکرات کی پیشکش

اسلام آباد: وزیراعظم شہباز شریف نے پاکستان تحریک انصاف کو مذاکرات کی پیشکش کرتے ہوئے کہا ہے کہ احتجاج اور دھرنوں کا سلسلہ ختم کیا جائے، حکومت کے دروازے بات چیت کے لیے کھلے ہیں۔

اسلام آباد میں ایک تقریب سے خطاب کرتے ہوئے وزیراعظم شہباز شریف نے کہا کہ مذاکرات کے ذریعے معاملات حل کرنے کی تمام کوششیں کی گئیں، تاہم وہ کامیاب نہ ہوسکیں۔ اب بھی بات چیت کا راستہ موجود ہے، لیکن احتجاج اور مارچ ختم کرنا ہوگا۔

وزیراعظم نے کہا کہ حکومت نے ڈھائی سال کی محنت اور ٹیم ورک کے ذریعے ملکی معیشت کو مستحکم کیا ہے۔ بڑی مشکل سے حاصل کیا گیا معاشی استحکام ملک کی ترقی اور قومی مفاد کے لیے ضروری ہے۔

انہوں نے کہا کہ ایک طرف ملک ترقی کی جانب بڑھ رہا ہے جبکہ دوسری طرف احتجاج اور دھرنوں کے باعث برآمدات، درآمدات اور مینوفیکچرنگ کے شعبے متاثر ہونے کا خدشہ ہے۔

شہباز شریف کا کہنا تھا کہ احتجاجی سیاست کا براہ راست اثر ملکی معیشت پر پڑتا ہے، اس لیے اپوزیشن کو ملک کی معاشی صورتحال اور عالمی ساکھ کو مدنظر رکھنا چاہیے۔

وزیراعظم نے اپوزیشن پر زور دیا کہ وہ احتجاج کے بجائے مذاکرات کا راستہ اختیار کرے اور ملکی ترقی کے عمل کو متاثر ہونے سے بچانے میں اپنا کردار ادا کرے۔