پی ٹی آئی مارچ سے پہلے بڑا فیصلہ، راولپنڈی اور اٹک میں انٹرنیٹ بند کرنے کی تیاری

راولپنڈی: پی ٹی آئی کے 27 ستمبر کو اسلام آباد کی جانب مارچ کے اعلان کے بعد راولپنڈی اور اٹک کے بعض علاقوں میں موبائل اور انٹرنیٹ سروس محدود کرنے کی تیاری کی جا رہی ہے۔

محکمہ داخلہ پنجاب نے وفاقی وزارت داخلہ کو مراسلہ ارسال کرتے ہوئے راولپنڈی کے مخصوص مقامات پر موبائل اور انٹرنیٹ سروس کو محدود کرنے کی درخواست کی ہے۔ مراسلے میں بعض علاقوں میں 2G، 3G اور 4G نیٹ ورک سگنلز کی معطلی کی درخواست بھی شامل ہے۔

ذرائع کے مطابق اٹک کے بعض علاقوں اور اہم شاہراہوں کے اطراف بھی موبائل و انٹرنیٹ سروس محدود کرنے کی درخواست کی گئی ہے۔ اس میں براہمہ باہتر، گنجو، احاطہ، ٹیکسلا سٹی، واہ صدر، تھلیاں اور چکری سمیت دیگر مقامات شامل ہیں۔

محکمہ داخلہ پنجاب کے مطابق سروسز محدود کرنے کی درخواست امن و امان برقرار رکھنے اور سیکیورٹی انتظامات کے تناظر میں کی گئی ہے۔ تاہم حتمی منظوری وفاقی وزارت داخلہ کی جانب سے دی جائے گی۔

دوسری جانب پی ٹی آئی نے 27 ستمبر کو اسلام آباد کی جانب مارچ کا اعلان کر رکھا ہے، جبکہ مارچ سے قبل راولپنڈی، اسلام آباد اور اٹک میں سیکیورٹی انتظامات بھی سخت کیے جا رہے ہیں۔