پاور سسٹم میں سنگل خریدار کی بجائے مسابقتی نظام کی منتقلی کی جانب اہم پیش رفت

اسلام آباد: پاکستان کے پاور سیکٹر میں سنگل خریدار نظام سے مسابقتی بجلی مارکیٹ کی جانب اہم پیش رفت ہوئی ہے، وزارتِ توانائی نے بجلی کی خرید و فروخت کے لیے ملکی تاریخ کی پہلی ویلنگ نیلامی کا عمل شروع کرتے ہوئے خواہشمند اداروں سے تجاویز طلب کرلی ہیں۔

پاور ڈویژن کی جانب سے ریکوئسٹ فار پروپوزل جاری کردی گئی ہے، جس کے تحت بجلی کی خرید و فروخت کا دوطرفہ مسابقتی نظام (CTBCM) کے تحت نیلامی کا عمل مکمل کیا جائے گا۔

اس عمل کے ذریعے کاروباری ادارے اور صنعتی صارفین مسابقتی بنیادوں پر پاور پلانٹس سے براہِ راست بجلی خرید سکیں گے۔ آئندہ پانچ سال کے دوران مجموعی طور پر 800 میگاواٹ بجلی کی نیلامی کا منصوبہ ہے، جبکہ پہلے مرحلے میں 400 میگاواٹ بجلی نیلامی کے لیے پیش کی جارہی ہے۔

وفاقی وزیر توانائی اویس لغاری نے نیلامی کے عمل کے آغاز پر وزیراعظم اور قوم کو مبارکباد دیتے ہوئے کہا کہ حکومت بجلی کی خریداری کے موجودہ مرکزی نظام سے عملی طور پر باہر نکل رہی ہے۔ ان کے مطابق مستقبل میں بجلی پیدا کرنے والے اور بڑے صارفین باہمی طور پر بجلی کی خرید و فروخت کرسکیں گے۔

اویس لغاری نے کہا کہ ابتدا میں ایک میگاواٹ سے زیادہ بجلی استعمال کرنے والے بڑے صارفین اس نظام سے فائدہ اٹھا سکیں گے، جبکہ مستقبل میں بجلی کی باقاعدہ مارکیٹ تشکیل پانے کے بعد عام صارفین کو بھی اپنی ضرورت کے مطابق بجلی خریدنے کا موقع مل سکے گا۔

وفاقی وزیر کے مطابق مسابقتی نظام سے صنعتی صارفین کو نسبتاً سستی بجلی کے حصول میں مدد مل سکتی ہے، جس سے پاکستانی صنعتوں کی عالمی منڈی میں مسابقت برقرار رکھنے میں معاونت ہوگی۔