بی ایم سی ہسپتال میں فارمیسی گریجویٹس سے انٹرن شپ فیس طلب کرنا ناقابلِ قبول ہے، ایکشن کمیٹی

بی ایم سی ہسپتال میں فارمیسی گریجویٹس سے انٹرن شپ کی فیس طلب کرنا ناقابلِ قبول، شرمناک اور قابلِ مذمت عمل ہے،بے روزگار فارماسسٹ ایکشن کمیٹی بلوچستان
بے روزگار فارماسسٹ ایکشن کمیٹی بلوچستان کے ترجمان نے اپنے جاری کردہ بیان میں کہا ہے کہ بی ایم سی ہسپتال کی جانب سے فارمیسی گریجویٹس سے انٹرن شپ کے لیے فیس طلب کرنا انتہائی افسوسناک، غیر منصفانہ اور قابلِ مذمت اقدام ہے۔ سرکاری ہسپتال میں فارمیسی گریجویٹس کو انٹرن شپ کا موقع فراہم کرنے کے بجائے ان سے رقم طلب کرنا پہلے سے بے روزگاری اور مشکلات کا شکار نوجوان فارماسسٹوں پر مزید مالی بوجھ ڈالنے کے مترادف ہے۔

ترجمان نے کہا کہ یونیورسٹی آف بلوچستان کے ساتھ موجود ایم او یو ختم کرنا، نیا ایم او یو سائن کرنے کے لیے فارمیسی گریجویٹس سے رقم طلب کرنا اور انٹرن شپ کے نام پر نوجوانوں کو مالی مشکلات میں مبتلا کرنا کسی صورت قابلِ قبول نہیں۔ اگر اداروں کے درمیان ایم او یو میں کوئی انتظامی مسئلہ ہے تو اس کا بوجھ فارمیسی گریجویٹس پر ڈالنا سراسر ناانصافی ہے۔

ترجمان نے مزید کہا کہ دیگر پروفیشنز کے گریجویٹس کو پیڈ ہاؤس جاب اور انٹرن شپ کے مواقع فراہم کیے جاتے ہیں، جبکہ فارمیسی گریجویٹس کو انٹرن شپ کے بنیادی حق سے محروم رکھنا اور پھر انٹرن شپ کے لیے انہی سے پیسے طلب کرنا ایک سنگین امتیازی رویہ ہے۔

بی ایم سی انتظامیہ کو واضح کرنا ہوگا کہ فارمیسی گریجویٹس سے انٹرن شپ کے نام پر فیس کیوں طلب کی جا رہی ہے؟ انتظامیہ کو چاہیے کہ نوجوان فارماسسٹوں سے پیسے لینے کے بجائے ان کے لیے باعزت اور باقاعدہ پیڈ انٹرن شپ/ہاؤس جاب کا نظام وضع کرے۔

ترجمان نے میڈیکل سپرنٹنڈنٹ بی ایم سی سے مطالبہ کیا کہ وہ اس فیصلے پر فوری نظرثانی کریں اور فارمیسی گریجویٹس سے انٹرن شپ فیس لینے کا سلسلہ فوری طور پر بند کریں۔ بصورتِ دیگر بے روزگار فارماسسٹ ایکشن کمیٹی بلوچستان اس معاملے پر اپنا آئندہ کا لائحہ عمل طے کرنے پر مجبور ہوگی۔

بے روزگار فارماسسٹ ایکشن کمیٹی بلوچستان نے وزیراعلیٰ بلوچستان میر سرفراز بگٹی، وزیرِ صحت بلوچستان اور سیکریٹری صحت بلوچستان سے مطالبہ کیا ہے کہ وہ اس معاملے کا فوری نوٹس لیتے ہوئے فارمیسی گریجویٹس کے ساتھ ہونے والی مبینہ ناانصافی کا ازالہ کریں اور انہیں دیگر پروفیشنز کے گریجویٹس کی طرح باعزت اور مساوی مواقع فراہم کیے جائیں۔