پولیس کی کارروائیاں، گرفتار ملزمان اسلحہ، نقدی اور مسروقہ موٹر سائیکل سمیت میڈیا کے سامنے پیش

گنداخہ:( نامہ نگار فرید احمد) پولیس اسٹیشن گنداخہ میں ڈی ایس پی سرکل گنداخہ محمد علی جمالی نے ایس ایچ او گنداخہ حاجی خان لاشاری اور ایڈیشنل ایس ایچ او باغ ٹیل محمد نواز راہوجہ کے ہمراہ سرکل گنداخہ کے تینوں تھانوں گنداخہ، باغ ہیڈ اور باغ ٹیل کی پولیس کارکردگی کے حوالے سے پریس کانفرنس کی۔ اس موقع پر پولیس کی جانب سے مختلف کارروائیوں کے دوران گرفتار کیے گئے ملزمان، برآمد ہونے والا اسلحہ، نقدی رقم اور مسروقہ موٹر سائیکل بھی میڈیا کے سامنے پیش کیے گئے۔پریس کانفرنس کے دوران ڈی ایس پی محمد علی جمالی نے پولیس کی جانب سے جرائم پیشہ عناصر کے خلاف کی جانے والی کارروائیوں، گرفتاریوں اور برآمدگیوں سے متعلق تفصیلات سے میڈیا نمائندگان کو آگاہ کیا۔ انہوں نے کہا کہ سرکل گنداخہ میں امن و امان برقرار رکھنے، جرائم کی روک تھام اور شہریوں کے جان و مال کے تحفظ کے لیے پولیس اپنی ذمہ داریاں پوری کررہی ہےانہوں نے کہا کہ جرائم پیشہ عناصر کے خلاف کارروائیاں مزید مؤثر بنائی جائیں گی، جبکہ مختلف مقدمات میں مطلوب اور جرائم میں ملوث افراد کے خلاف قانون کے مطابق کارروائی کا سلسلہ جاری رہے گا۔ اس موقع پر ایس ایچ او گنداخہ حاجی خان لاشاری، ایڈیشنل ایس ایچ او باغ ٹیل محمد نواز راہوجہ سمیت پولیس افسران و اہلکار بھی موجود تھے۔