یومِ دفاعِ پاکستان کے موقع پر مزارِ قائد پر تبدیلیِ گارڈز کی پروقار تقریب

کراچی: یومِ دفاعِ پاکستان کے موقع پر مزارِ قائد کراچی میں تبدیلیِ گارڈز کی پروقار تقریب کا انعقاد کیا گیا، جہاں شہدائے وطن کو خراجِ عقیدت پیش کرنے کے ساتھ بانیِ پاکستان قائداعظم محمد علی جناحؒ کی خدمات اور اصولوں کو بھی یاد کیا گیا۔

تقریب میں پاک فضائیہ اکیڈمی اصغر خان کے 72 ایوی ایشن کیڈٹس پر مشتمل چاق و چوبند دستے نے مزارِ قائد پر گارڈز کے فرائض سنبھال لیے۔ ایئر آفیسر کمانڈنگ پاک فضائیہ اکیڈمی اصغر خان ایئر وائس مارشل حسن فیصل تقریب کے مہمانِ خصوصی تھے۔

تقریب کا آغاز تلاوتِ کلامِ پاک اور ملک کے دفاع کے لیے جانیں قربان کرنے والے شہداء کے لیے خصوصی دعا سے ہوا۔ مہمانِ خصوصی نے مزارِ قائد پر پھولوں کی چادر چڑھائی، فاتحہ خوانی کی اور مہمانوں کی کتاب میں اپنے تاثرات درج کیے۔

اس موقع پر ایئر وائس مارشل حسن فیصل نے کہا کہ 6 ستمبر قوم کو اس تاریخی دن کی یاد دلاتا ہے جب مسلح افواج نے دشمن کے عزائم کا مقابلہ کرتے ہوئے وطن کا دفاع کیا۔ انہوں نے شہداء کی قربانیوں کو خراجِ عقیدت پیش کرتے ہوئے کہا کہ پاک فضائیہ نے ہر مشکل مرحلے میں ملکی سلامتی کو اپنی اولین ذمہ داری سمجھا ہے۔

انہوں نے کہا کہ حالیہ معرکے میں نظم و ضبط، باہمی تعاون اور بروقت فیصلوں نے اہم کردار ادا کیا، جبکہ مختلف دفاعی صلاحیتوں کو مؤثر انداز میں بروئے کار لا کر پاکستان نے جارحیت کا بھرپور جواب دیا۔

ایئر وائس مارشل حسن فیصل نے کہا کہ ملکی فضائی حدود کا دفاع پاک فضائیہ کے تربیت یافتہ اور پیشہ ور اہلکاروں کے مضبوط ہاتھوں میں ہے۔ ان کے مطابق جدید ٹیکنالوجی، نئے ہتھیاروں کے نظام، مصنوعی ذہانت، سائبر اور خلائی صلاحیتوں سمیت دیگر شعبوں میں پیش رفت نے پاک فضائیہ کی دفاعی استعداد میں مزید اضافہ کیا ہے۔

انہوں نے واضح کیا کہ جدید ٹیکنالوجی اپنی جگہ اہم ہے، تاہم پاک فضائیہ کی اصل طاقت اس کے باصلاحیت اہلکار، اعلیٰ تربیت، پیشہ ورانہ مہارت اور درست وقت پر درست فیصلہ کرنے کی صلاحیت ہے۔

ان کا کہنا تھا کہ پاکستان خطے میں امن اور استحکام کا خواہاں ہے، لیکن ملکی خودمختاری، قومی وقار اور سلامتی کے تحفظ پر کوئی سمجھوتہ نہیں کیا جائے گا۔

تقریب کے اختتام پر قائداعظم محمد علی جناحؒ کے اصولوں اور نظریات کو مشعلِ راہ بناتے ہوئے ملک کے دفاع کو مزید مضبوط بنانے کے عزم کا اعادہ کیا گیا۔