پاکستان سے سعودی عرب زرعی اور غذائی برآمدات کے لیے 3 ارب ڈالر کا ہدف مقرر

اسلام آباد: پاکستان اور سعودی عرب نے زرعی و غذائی مصنوعات کی تجارت بڑھانے کے لیے اہم ہدف مقرر کرلیا، دونوں ممالک نے پاکستانی زرعی و غذائی برآمدات کو آئندہ دو سال میں 3 ارب ڈالر تک پہنچانے کے عزم کا اظہار کیا ہے۔

مشترکہ اعلامیے کے مطابق سعودی عرب کو پاکستان سے چاول، سرخ گوشت، پراسیسڈ فوڈ، پھل، فروٹ کنسنٹریٹس اور سبز چارے کی برآمدات بڑھائی جائیں گی۔

اعلامیے میں بتایا گیا کہ سعودی وفد نے 26 سے 28 اگست تک اسلام آباد کا دورہ کیا، اس دوران وزیراعظم شہباز شریف اور پاکستانی حکام سے زرعی و غذائی شعبے میں تعاون پر تفصیلی بات چیت ہوئی۔

دونوں ممالک نے سعودی نجی شعبے کے ساتھ مل کر تجارت اور سرمایہ کاری بڑھانے، زرعی ٹیکنالوجی کے فروغ اور معیار کی سرٹیفکیشن کے معاملات میں تعاون پر بھی اتفاق کیا۔

سعودی وفد نے پاکستان سے سرخ گوشت کی درآمد بتدریج دگنی کرنے میں دلچسپی ظاہر کی، جبکہ چاول، پھل اور سبز چارے کی برآمدات بڑھانے کے امکانات کا بھی جائزہ لیا گیا۔

دونوں جانب سے پاکستان اور سعودی عرب کے درمیان دیرینہ برادرانہ تعلقات اور وسیع تر اسٹریٹجک شراکت داری کو مزید مضبوط بنانے کے عزم کا اعادہ کیا گیا۔