سابق گورنر بلوچستان جنرل (ر) عمران اللہ خان کی نماز جنازہ ادا، وزیراعلیٰ بلوچستان کی شرکت

چارسدہ میں سابق گورنر بلوچستان جنرل ریٹائرڈ عمران اللہ خان کی نماز جنازہ ادا کر دی گئی، جس میں وزیراعلیٰ بلوچستان میر سرفراز بگٹی نے بھی شرکت کی۔

وزیراعلیٰ بلوچستان نے مرحوم جنرل (ر) عمران اللہ خان کی خدمات کو خراج عقیدت پیش کرتے ہوئے کہا کہ وہ ایک باوقار، مدبر اور نفیس شخصیت کے مالک تھے۔

میر سرفراز بگٹی کا کہنا تھا کہ جنرل (ر) عمران اللہ خان ان کے والد مرحوم میر غلام قادر بگٹی کے قریبی دوست تھے، ان کی وفات سے ایک مخلص اور قابل احترام شخصیت ہم سے جدا ہو گئی۔

انہوں نے کہا کہ مرحوم کی قومی خدمات کو ہمیشہ قدر کی نگاہ سے یاد رکھا جائے گا۔ وزیراعلیٰ بلوچستان نے دعا کی کہ اللہ تعالیٰ مرحوم کے درجات بلند فرمائے اور لواحقین کو صبر جمیل عطا کرے۔