آپریشن سندور پر بھارتی ڈاکومینٹری حقائق مسخ کرنے کی کوشش ہے، آئی ایس پی آر

راولپنڈی: پاک فوج کے شعبہ تعلقات عامہ (آئی ایس پی آر) نے نام نہاد آپریشن سندور پر بنائی گئی بھارتی ڈاکومینٹری کو حقائق کے برعکس قرار دیتے ہوئے کہا ہے کہ بھارت معرکہ حق میں شکست کی حقیقت تسلیم کرنے سے انکاری ہے۔

آئی ایس پی آر کے مطابق بھارتی ڈاکومینٹری میں تاریخ کو اپنی مرضی کے مطابق پیش کرنے کی کوشش کی گئی ہے اور جذباتی و فلمی انداز کے ذریعے حقائق کو تبدیل کرنے کی کوشش کی گئی۔

ترجمان نے کہا کہ بھارتی فلم میں پیش کیا گیا بیانیہ تضادات سے بھرپور ہے، جبکہ جنگی حقائق، آپریشنل ریکارڈ اور واقعات کو محض منظر کشی سے تبدیل نہیں کیا جا سکتا۔

آئی ایس پی آر کا کہنا تھا کہ پاکستان کو کسی مصنوعی بیانیے کی ضرورت نہیں، جنگی ریکارڈ، سفارتی رابطے اور حقائق خود صورتحال واضح کرتے ہیں۔ ترجمان نے دعویٰ کیا کہ معرکہ حق کے دوران پاکستان نے بھارتی جارحیت کا مؤثر جواب دیا۔

آئی ایس پی آر کے مطابق جنگ بندی دونوں ممالک کے ڈی جی ایم اوز کے درمیان اتفاق رائے سے ہوئی، جسے یکطرفہ کامیابی قرار دینا درست نہیں۔ ترجمان نے کہا کہ کسی بھی آئندہ فوجی مہم جوئی کی صورت میں پاکستان اپنے دفاع کے لیے بھرپور جواب دینے کی صلاحیت رکھتا ہے۔