بگھی میں پروٹوکول پر آئی جی اسلام آباد اور کمشنر کو تنقید کا سامنا

بگھی میں پروٹوکول پر آئی جی اسلام آباد اور کمشنر کو تنقید کا سامنا

اسلام آباد: یومِ آزادی کے موقع پر ڈی چوک میں منعقدہ پریڈ کے دوران آئی جی اسلام آباد اور کمشنر و چیئرمین سی ڈی اے کی بگھی میں سوار ہونے کی ویڈیوز سوشل میڈیا پر وائرل ہوگئیں، جس کے بعد صارفین کی جانب سے شدید ردعمل سامنے آیا۔

سوشل میڈیا صارفین نے سرکاری افسران کے بگھی میں پروٹوکول کے استعمال پر سوالات اٹھاتے ہوئے اسے وی آئی پی کلچر اور حکمران اشرافیہ کے طرزِ عمل سے جوڑا۔

صحافیوں اور دیگر عوامی حلقوں کی جانب سے بھی معاملے پر تنقید کی گئی۔ بعض صارفین نے سرکاری عہدیداروں سے عوامی وسائل کے استعمال میں سادگی اور ذمہ داری کا مظاہرہ کرنے کا مطالبہ کیا۔

معاملے پر وفاقی وزیر داخلہ محسن نقوی نے دونوں افسران کا دفاع کرتے ہوئے کہا کہ بگھی میں سوار ہونا یومِ آزادی کی تقریب کا حصہ تھا اور اسے غیر ضروری تنقید کا نشانہ نہیں بنایا جانا چاہیے۔

سوشل میڈیا پر بعض صارفین نے دیگر ممالک کے حکام کی سادگی کی مثالیں دیتے ہوئے پاکستان میں وی آئی پی کلچر پر بھی سوالات اٹھائے۔