کراچی میں ایک ہی خاندان کے چار بچوں میں ایچ آئی وی کی تصدیق

کراچی: شہر قائد کے علاقے ضیا کالونی میں ایک ہی خاندان کے چار بچوں میں ایچ آئی وی (HIV) کی تصدیق ہوگئی، جس کے بعد متاثرہ بچوں کی تعداد 81 تک پہنچ گئی ہے۔

متاثرہ بچوں کے والد کے مطابق ان کے 10 سالہ بیٹے کی رپورٹ بھی مثبت آ گئی ہے، جبکہ اس سے دو روز قبل ان کی 9 سالہ بیٹی میں بھی ایچ آئی وی کی تشخیص ہوئی تھی۔ والد کا کہنا ہے کہ اس سے پہلے ان کے 12 سالہ اور 3 سالہ بیٹوں میں بھی وائرس کی تصدیق ہو چکی تھی۔

انہوں نے بتایا کہ ان کے چاروں بچے اب ایچ آئی وی سے متاثر ہیں۔ بچوں کو ابتدا میں معمولی علاج کے لیے اسپتال لے جایا گیا تھا، تاہم بعد میں معلوم ہوا کہ وہ ایک ایسی بیماری کا شکار ہو چکے ہیں جس کے لیے طویل مدتی علاج اور نگہداشت کی ضرورت ہوتی ہے۔

متاثرہ بچوں کے والد نے سندھ حکومت سے مطالبہ کیا ہے کہ واقعے کی شفاف اور غیرجانبدارانہ تحقیقات کرائی جائیں تاکہ بچوں میں وائرس منتقل ہونے کی اصل وجوہات اور ذمہ دار عناصر کا تعین کیا جا سکے۔

انہوں نے حکومت سے اپیل کی کہ متاثرہ بچوں کو بہتر علاج، انصاف اور ضروری سہولیات فراہم کی جائیں۔

دوسری جانب متعلقہ اداروں کے مطابق کراچی میں ایچ آئی وی سے متاثرہ بچوں کے کیسز کی تحقیقات جاری ہیں، جبکہ متاثرہ بچوں کے علاج اور دیکھ بھال کے لیے اقدامات کیے جا رہے ہیں۔