برطانیہ اور پاکستان کا نادرا، سائبر کرائم، انسداد منشیات، ویزا فراڈ کے خلاف تعاون بڑھانے پر اتفاق

اسلام آباد: پاکستان اور برطانیہ نے انسداد دہشت گردی، منشیات کی روک تھام، سائبر کرائم، غیر قانونی امیگریشن اور ویزا فراڈ کے خلاف مشترکہ تعاون مزید بڑھانے پر اتفاق کیا ہے۔

برطانوی وزیر مملکت برائے سلامتی ڈین جاروس نے پاکستان کا دورہ کیا اور نائب وزیراعظم و وزیر خارجہ اسحاق ڈار، وزیر داخلہ محسن نقوی اور دیگر حکام سے ملاقاتیں کیں۔

وزارت داخلہ میں ہونے والے وفود کی سطح کے اجلاس میں افغانستان کی صورتحال، علاقائی سلامتی، دہشت گردی اور سنگین منظم جرائم کے خلاف مشترکہ اقدامات پر تبادلہ خیال کیا گیا۔

دونوں ممالک نے معلومات کے تبادلے کو بہتر بنانے، قانون نافذ کرنے والے اداروں کے درمیان رابطے مضبوط کرنے اور جرائم پیشہ نیٹ ورکس کے خلاف مؤثر اقدامات پر اتفاق کیا۔

برطانوی وزیر مملکت ڈین جاروس نے کہا کہ دونوں ممالک کو مشترکہ سیکیورٹی خطرات کا سامنا ہے، جن سے نمٹنے کے لیے مل کر کام کرنا ضروری ہے۔ انہوں نے غیر قانونی امیگریشن کی روک تھام میں ایف آئی اے کی کارکردگی کو بھی سراہا۔

ملاقات میں انسداد منشیات کے حوالے سے مفاہمتی یادداشت کو جلد حتمی شکل دینے کا فیصلہ کیا گیا، جس سے برطانیہ کی نیشنل کرائم ایجنسی اور پاکستان کی اینٹی نارکوٹکس فورس کے درمیان تعاون کو مزید مؤثر بنایا جائے گا۔

وزیر داخلہ محسن نقوی نے بتایا کہ گزشتہ چند سال کے دوران برطانیہ اسمگل کی جانے والی منشیات کے 330 کیسز ناکام بنائے گئے۔ انہوں نے اپسکیل منصوبے کو پاکستانی اداروں کی استعداد کار بڑھانے کے لیے اہم قرار دیا۔

اجلاس میں پاکستان اور برطانیہ کی وزارت داخلہ کے درمیان قائم ورکنگ گروپ کا اجلاس جلد بلانے پر بھی اتفاق کیا گیا۔