بلوچستان میں حکومتی رٹ ختم، شاہراہیں غیر محفوظ، ماہ رنگ بلوچ کو رہا کیا جائے: اسد قیصر

کوئٹہ: سابق اسپیکر قومی اسمبلی اور پاکستان تحریک انصاف کے مرکزی رہنما اسد قیصر نے کوئٹہ میں پریس کانفرنس کرتے ہوئے کہا ہے کہ وہ خیبرپختونخوا اور پاکستان تحریک انصاف کی جانب سے بلوچستان کے عوام کے لیے محبت اور یکجہتی کا پیغام لے کر آئے ہیں۔ انہوں نے کہا کہ بلوچستان کے عوام نے ملک کے لیے بے شمار قربانیاں دی ہیں، تاہم موجودہ صورتحال انتہائی تشویشناک ہے۔

اسد قیصر نے دعویٰ کیا کہ بلوچستان میں اس وقت حکومتی رٹ نظر نہیں آتی اور صوبے کی شاہراہیں غیر محفوظ ہو چکی ہیں۔ انہوں نے کہا کہ دورانِ سفر لوگوں کو قتل کیا جا رہا ہے، ایسے حالات میں نہ سرمایہ کاری ممکن ہے اور نہ ہی معاشی ترقی۔

انہوں نے کہا کہ بلوچستان میں ہمیشہ ایسی حکومتیں قائم کی گئیں جنہیں عوامی مینڈیٹ حاصل نہیں تھا، جبکہ اسمبلی میں بھی اکثریتی نمائندے حقیقی عوامی نمائندے نہیں ہیں۔ ان کے بقول جب عوام سے ان کا بنیادی حق چھین لیا جائے تو حالات خراب ہونا فطری امر ہے۔

پی ٹی آئی رہنما نے ماہ رنگ بلوچ کی رہائی کا مطالبہ کرتے ہوئے ان کی سزا کی مذمت کی۔ انہوں نے یہ بھی دعویٰ کیا کہ عمران خان کو مزید سزائیں دلوانے کی منصوبہ بندی کی جا رہی ہے اور انصاف کے لیے سب کو آواز بلند کرنا ہوگی۔

اسد قیصر نے کہا کہ بلوچستان کے عوام کو آئین اور قانون کے مطابق ان کے حقوق دیے جائیں، تجارتی بارڈرز فوری طور پر کھولے جائیں کیونکہ ان کی بندش سے بے روزگاری میں اضافہ اور نوجوانوں میں مایوسی بڑھ رہی ہے۔ انہوں نے نیشنل ایکشن پلان پر مؤثر عملدرآمد کا مطالبہ بھی کیا۔

انہوں نے مزید کہا کہ قومی اسمبلی میں ہونے والی قانون سازی عوامی مسائل کے حل پر مرکوز ہونی چاہیے تاکہ ملک میں سیاسی استحکام اور عوام کا اعتماد بحال ہو سکے۔